Kesheli beri álemdik BAQ-ty dúr silkindirgen aqparat taraldy. Ýkraına prezıdenti Petr Poroshenko Grýzıanyń eks-prezıdenti, Odessanyń bas gýbernatory bolǵan Mıhaıl Saakashvılıdi Ýkraına azamattyǵynan aıyrǵan. Sebebi Saakashvılıdiń bılikten jasyrǵan qupıa qujattarynyń bary anyqtalǵan. Osyǵan baılanysty sheteldik sarapshylar ózderiniń pikirin jazyp jarysýda. Qamshy.kz aqparat agenttiginiń tilshisi eks-gýbernatorǵa qatysty aıtylǵan pikirlerdi jınaqtap, oqyrman nazaryna usynady.

Saakashvılıdiń ózi atalmysh sheshimge qatysty vıdeo máimdeme jasady. Onda óziniń qarapaıym ýkraın azamaty ekenin aıtyp, Poroshenkonyń shekten shyqqanyna nalydy.

«Men Ýkraınada 13 jyl boıy ómir súrip kelemin. Úsh revolúsıaǵa at salystym. Bir ǵana azamattyǵym bar – ýkraındyq.

Búgin de maǵan «qashqyn» statýsyn jamap qoımaqshy. Olarynan túk shyǵa qoımas. Ózge memleketterdi aralap, pana izdep júretin jaıym joq. Ýkraınaǵa qaıtyp, ádilettilikke qol jetkizemin.

Poroshenko meniń Ýkraınada joqtyǵymdy paıdalanyp, azamattyqtan aıyrdy», - deı kele ýkraın  halqynyń dál osyndaı jaǵdaımen buryn da kezdeskenin esine saldy, eskertti.

«Men Ýkraına azamattyǵyn qabyldadym. Ýkraınanyń bolashaǵy men reforma úshin kúrestim. Azamattyq – men úshin jaı sóz emes. Óz qujatymnan Ýkraına azamaty degendi kórgen saıyn halyq aldyndaǵy jaýapkershiligimdi sezinip, halyqtyń ıgiligi úshin jumys istedim. Ýkraınanyń jeńiske jetip, eýropalyq derjava atanǵanyn qaladym...».

Málimdemesinde óziniń Ýkraınaǵa degen mahabbatyn jetkizip, azamattyqty qalaı da qaıtaratynyna sóz berdi.

Birinshi kezekte Reseıdiń Premer-mınıstri Dmıtrıı Medvedev Mıhaıl Saakashvılıdiń Ýkraına azamattyǵynan aıyrý jóninde sheshimge «Shoý jalǵasyn tabý kerek» degen pikir aıtty.

«Saakashvılıdiń taǵdyryna tań qalasyń: Grýzıa azamaty, Grýzıa prezıdenti, Grýzıanyń azamattyǵynan aıyrylǵan tulǵa, Ýkraına azamaty, Ýkraına prezıdentiniń dosy, Odessa oblysynyń gýbernatory, Ýkraına azamattyǵynan aıyrylǵan tulǵa. Ýkraına bıliginiń júıesine de tańyrqap qaraısyń – Grýzıanyń burynǵy prezıdentin qabyldaıdy, ony gýbernator etedi, sosyn azamattyqtan aıyrady. Munyń bári – fantasıkalyq tragıkomedıany oınatyp jatqan eki adamnyń moraldyq sıpatynyń dáleli. Shoý jalǵasýy kerek», - dep jazdy Medvedev.  

Al Poroshenkonyń sheshimine qatysty Ýkraına halqynyń pikiri ekige bólindi. Bir tarap prezıdenttiń isin aqymaqtyqqa balasa, ekinishisi Saakashvılıdiń elden aýlaq bolǵanyn jón sanaıdy. 

Ýkraınanyń halyq depýtaty Mýstafa Naıemniń pikirinshe, Mıhaıl Saakashvılıdiń Ýkraına azamattyǵynan aıyrý – naǵyz aqymaqtyq. Naıem Ýkraına prezıdentiniń bul qylyǵyn prezıdentke tán is emes ekenin basa aıtty.

«Mıhaılmen kelispeýge bolatyn shyǵar, ol kóptiń kóńilinen shyqpaýy múmkin. Alaıda Saakashvılıdiń órkenıetti barrıkady bizdiń jaqta», - dedi ol óziniń Feısbýktegi paraqshasynda.

Sondaı-aq ýkraınalyq saıasatker Egor Fırsov ta Poroshenkonyń úlken qatelikke boı aldyrǵanyn aıtty.

«Mundaı sheshim arqyly prezıdent óziniń aqymaqtyǵyn ǵana emes, úreıi men ózine degen  senimsizdigin kórsetti. Poroshenkonyń da sanasyn Ianýkovıchtiń burynǵy ádis-tásilderi jaýlaǵan kórinedi. Osyndaı qadamdarǵa barý arqyly bılik neni kózdeıdi eken? Óziniń bul isi arqyly Poroshenko Saakashvılıdiń senimin arttyryp, boıyna kúsh darytty ári álemge tanymal etti. Biz jańa rejımmen kúreste myqtyraq bolamyz»,- dep jazdy.

Al prezıdenttiń sheshimin qoldaǵan tarap Saakashvılıdiń elge qaıtyp oralmaýyn jóy sanady. Halyq depýtaty Sergeı Leshenko da únsiz qalmady. Onyń AQSH-ta ekenin eskergen ol óziniń Feısbýktegi paraqshasyna bylaı dep jazdy:

«Bul proses arqyly Saakashvılı Ýkranıaǵa qaıtyp kele almaıdy. Kelgen kúnniń ózinde ony Borıspolede ustap, alǵashqy múmkindikte-aq Grýzıaǵa jiberedi. Sol kezde Mıhaıldy ekstradısıalaý múmkin bolmaıdy. Sóıtip Saakashvılı Amerıkadan pana izdeýge májbúr bolady. Sebebi Ýkraına saıasatynda oǵan oryn joq», - dedi ol.

Onyń sózderine qaraǵanda, Saakashvılı Ýkraına azamattyǵyn alý barysynda óziniń ómirine qatysty shyndyqtardy jasyryp qalǵan.

«Men Saakashvılıge Ýkraına azamattyǵyn bererde qarsylyq tanyttym, áli de qarsymyn. Ýkraın halqynyń ózine artqan senimine qaramastan, ol úmitti aqtaı almady. Odesso men turǵyndardyń ıgiligine jumys isteýdiń ornyna Mıhaıl ózin jarnamalaýdan qoly bireli bosaǵan emes», - dep jazdy.

Sondaı-aq Saakashvılıdiń AQSH pen Nıderland elderinde ózin damytýǵa múmkindik týǵanyn aıtty.

«Alaıda ol jerde bos sóılegen adamdarǵa sene beretin halyq joq», - dep aıaqtady sózin.

Sondaı-aq, Leshenko Ianýkovıchtiń  óz qarsylastaryn túrmede jatqanda oqshaýlaǵanyn eske salyp, Poroshenkonyń Mıhaıldy shetelde júrgen kezin paıdalanǵanyn tilge tıek etti.

Halyq depýtaty Anton Gerashenko da Poroshenkonyń atalmysh sheshimine qatysty pikir bildirdi.

«Saakashvılı rasynda Ýkraına azamattyǵy degen statýstan aıyryldy. Mundaı sheshim Ýkraınanyń «Azamattyq týraly» zańnamasynyń 21-babyna sáıkes qabyldandy. Birneshe kún buryn Grýzıa bas prokýratýrasy Ýkraınaǵa Saakashvılı Ýkraına azamattyǵyn alý barysynda jasyrǵan qujattardy jiberdi», - dep málimdedi Gerashenko.

Qazaqstandyq sarapshylar da únsiz qalmady. Ýkraına prezıdentiniń sheshimine qatysty saıasatker Ámirjan Qosanov eki jaqty pikir bildirdi:

«Sóz joq, onyń demokratıashyldyǵy, jemqorlyqqa qarsy kúrestegi jetistikteri, Grýzıanyń Táýelsizdigi jolyndaǵy kúresi, eliniń Eýropa jolyn qalaýyna at salysýy - quptarlyq ári qurmetke laıyq. Biraq onyń keıbir áreketterinde popýlızm men maksımalızm bar ekeni de kózge uryp tur.

Sóz joq, onyń jeke basyna qarsy óz otanynda, Ýkraınada jasalyp jatqan qadamdardy da qoldaý qıyn.

Árıne, Grýzıadaǵy klanaralyq ári saıası sıpaty bar kúrestiń saldaryn men túsinemin.
Bireýler ony Qazaqstanǵa shaqyryp, bılikke aralassyn dep jatyr. Shaqyratyn bolsaq, syrtta jáne elde júrgen óz reformatorlarymyz da bar! Ashyq saıası báseke bolsa, olar da qazirgi sheneýnikterge myqty qarsylas bola alar edi!

Bir sózben aıtqanda, "ózge jurtta sultan (nemese gýbernator) bolǵansha, óz elińde ultan bol"!
Osy jaǵdaıda Grýzıa da, onyń keshegi prezıdenti de ózgerýi kerek sıaqty!».

Sarapshy Rýslan Túsipbekov te bul sheshimdi Saakashvılıdiń emes, Ýkraınanyń jeńilisi dep tanydy.

«Bul proseste jeńilis tapqan Saakashvılı emes, Ýkrıananyń ózi. Odessa portyndaǵy tártipsizdik jalǵasatyn bolady. Búkil memleket boıynsha...».

Aıta keteıik, Ýkraına prezıdenti Petr Poroshenko Grýzıanyń eks-prezıdenti, Odessanyń burynǵy gýbernatory Mıhaıl Saakashvılıdi Ýkraına azamattyǵynan aıyrý týraly buıryqqa qol qoıdy.

Saakashvılıdi azamattyqtan aıyrýdy Bas prokýratýradan Joǵarǵy Rada depýtaty Andreı Lozovoı suraǵan. Al prokýratýra bul shaǵymdy mıgrasıalyq qyzmetke jibergen.

Mıhaıl Saakashvılı 2016 jyly gýbernatorlyq qyzmetten ketken soń Poroshenko ony Ýkraına azamattyǵynan aıyrylýy múmkin ekenin aıtqan. 2015 jyly Grýzıa Saakashvılıdi azamattyqtan aıyrdy. Onyń áıeli Sandra Rýlofs - Golandıa azamaty.