Elordada «Astana Open-2017» halyqaralyq shahmat festıvali ótýde, dep habarlaıdy Qamshy.kz  aqparat agenttigi  Astana ákimdiginiń baspasóz qyzmetine silteme jasaı otyryp.

Qazaqstanda mundaı deńgeıdegi shara alǵash ret uıymdastyryldy. Festıvál baǵdarlamasynda ártúrli formattaǵy balalar men eresekter arasynda bes týrnır bar, sonymen qatar tóreshiler úshin halyqaralyq shahmat federasıasynyń semınary ótedi.

Bul jarys – dástúrli túrde 6 jyldan beri ótkizilip keledi. Festıváldiń ashylý saltanatyna halyqaralyq shahmat federasıasynyń prezıdenti Kırsan Ilúmjınov qatysty.

Festıvál álemdik jarystar aldyndaǵy erler, áıelder men balalar-jasóspirimder quramasynyń eń mańyzdy daıyndyq kezeńi bolyp tabylady.

Bıylǵy jarystyń eń negizgi ereksheligi – aýqymdylyǵynda, deıdi uıymdastyrýshylardyń biri Erjan Shakenov. Alǵash ret bul jerde 12 elden (Qazaqstan, Reseı, AQSH, Bolgarıa, Egıpet, Ýkraına, Mońǵolıa, Tájikstan, Armenıa, Belorýs, Ózbekstan, Qyrǵyzstan) alty júz sportshy qatysýda.

Qatysýshylar arasynda – halyqaralyq grosmeısterler, sheberler, álemdik jáne azıalyq saıystardyń chempıondary men júldegerleri (Ásel Serikbaı, Ámına Qaıyrbekova, Nazerke Nurǵalı, Merýert Kamalıdenova, Sátbek Ahmedınov, Aldıar Ańsat, Qazybek Nógerbek jáne t.b) bar.

Jarystyń bas tóreshisi – halyqaralyq deńgeıdegi qazy Sergeı Iýrovskıı.

Uıymdastyrýshylar bıyl qatysýshylar jarystan bólek ýaqyttaryn tıimdi ótkizetinin aıtady. Kóbi EKSPO kórmesine barýǵa nıet tanytypty.

29 shilde festıvál aıaqtalady. Jeńimpazdar aqshalaı syılyqtarǵa ıe bolady.

 - Bul festıváldiń júlde qory – 11 mıllıonnan astam teńge. Birinshi oryn úshin jeńimpaz eki mıllıon teńge alady. Júlde qory 20-shy orynǵa deıin qarastyrylǵan, - dedi E.Shakenov.