7 tamyzda Astana qalasynyń ákimi Áset Isekeshev Belarýs Respýblıkasy Premer-mınıstriniń orynbasary Anatolıı Kalınınmen ekijaqty kezdesý ótkizdi, dep habarlaıdy Qamshy.kz aqparat agenttigi.

Qala ákimdiginiń málimetine súıensek, Belarýs delegasıasy elordamyzǵa EKSPO-2017 kórmesiniń qurylys nysandary salasynda, qalalyq ınfraqurylym, komýnaldy sharýashylyq basqarmasy sektorynda Astananyń tájirıbesin úırený úshin keldi.

Kezdesý barysynda taraptar sáýlet jáne qala qurylysy, smart tehnologıalardy qoldaný, qalalyq sharýashylyqty basqarý, energotıimdi jasyl qurylys standarttaryn qoldaný, qoǵamdyq kóliktiń jumysy, aýmaqty abattandyrý salasynda yntymaqtastyq máselesin talqylady. Energotıimdi tehnologıalardy qoldaný men qalalardy damytý salasynda yntymaqtastyq ornatý jáne tájirıbe almasý basty ári ózekti másele boldy. Oǵan qosa, qos tarap komýnaldy tehnıka jáne jabdyqtar óndirisi salasynda ónerkásiptik kooperasıada yntymaqtastyq máselesin talqylady.

Onymen birge Belarýs eliniń delegasıasy Astananyń bas josparymen tanysyp, qala basshylyǵymen qosymsha kezdesýler ótkizdi.

Esterińizge sala keteıik, Elbasynyń tapsyrmasy boıynsha Astanada 2020 jylǵa deıin qalany damytý baǵdarlamasy iske asyrylýda, oǵan sáıkes Astana shahary ózin aqyldy ári qaýipsiz qala, óńir sheńberinde ınvestorlar men ınovasıalar úshin óńirlik halyqaralyq ortalyq retinde qalyptastyrady.