Bıyl Memlekettik bilim granttarynyń ıegerleri jarıalanǵan soń, grantsyz qalǵan talapkerler men ata-analar tarapynan kóptegen suraq týyndady. Osyǵan oraı, 13 tamyzda «Atameken» UKP, bilim salasy qyzmetkerleriniń kásipodaqtarynyń, JOO qaýymdastyǵynyń, sondaı-aq ata-analar qaýymy ókilderiniń qatysýymen ótken Memlekettik bilim granttaryn berý jónindegi respýblıkalyq komısıanyń otyrysy ótken edi. Nátıjesinde, granttar tizimi 3,5% nemese 1487 grantqa ulǵaıtyldy dep habarlaıdy Qamshy.kz aqparat agenttigi.
Búgin Ortalyq komýnıkasıalar qyzmeti alańynda komısıanyń jumys toby men qorytyndysy boıynsha QR Bilim jáne Ǵylym mınıstrliginiń ókilderi jýrnalısermen baspasóz konferensıasyn ótkizdi.
– «Altyn belgi» ıegerlerine bilim granttary tıesili bolǵandyqtan, respýblıkalyq komısıa bul sanattaǵy talapkerlerdi granttarmen ýnıversıtetterdiń, sondaı-aq bilim jáne ǵylym mınıstrligi men densaýlyq saqtaý mınıstrligi qarajattary esebinen qamtamasyz etetin bolady. Bul «Altyn belgi» ıegerleriniń bilim deńgeıiniń negizinen joǵary ekendiginiń taǵy bir kórsetkishi. Sondyqtan da «Altyn belgi» ıegerleri grantsyz qaldyrylmaıdy, – dedi JOO Qaýymdastyǵynyń Prezıdenti, komısıa múshesi Rahman Alshanov.
Sonymen qatar, komısıa jumysynyń otyrysyna ata-analardyń ókili de qatystyrylǵan. Olardy Ulttyq testileý ortalyǵynda granttardy bóletin avtomattandyrylǵan júıe jumysymen tanystyrǵan.
– Granttardy bólý prosesiniń ashyqtyǵyna jáne onda adamı faktordyń joqtyǵyna kózimiz jetti. Mundaǵy júıe boıynsha biri tómen balmen suranysqa ıe mamandyqqa tapsyrady, endi biri joǵary balmen tómen nemese ortasha mamandyqtardy tańdaıdy. Sondyqtan da UBT-nyń nátıjesi osylaı shyqqanyn túsindik, – dedi baspasóz-konferensıaǵa qatysqan ata-analar qaýymynyń ókili Nurlygúl Aqashova
Óz kezeginde mınıstrlik aldaǵy aptada «Altyn belgi» ıelenip, biraq UBT barysynda tómen nátıje kórsetken túlekterdiń mektepterinde tekserý júrgizetini týraly málimdedi. Onyń nátıjesi túlekterge áser etpeıtinin habarlaǵan spıkerler «Altyn belgini» taǵaıyndaý barysynda qujattardy burmalaý faktileri anyqtalǵan jaǵdaıda mektep basshylyǵyna qatań sharalar qoldanylatynyn eskertti.
