Qazaqstan Respýblıkasy Densaýlyq saqtaý mınıstri Eljan Birtanov jedel járdem qyzmetiniń jańa standartyna qatysty pikirin bildirdi. Onyń aıtýynsha, jańa ereje jyl sońyna deıin óz tıimdiligin kórsetpek, dep habarlaıdy Qamshy.kz aqparat agenttigi QazAqparatqa silteme jasaı otyryp.

«Álbette, jedel járdem kólikteriniń aýyldy jerlerge jetý máselesi ótkir kúıinde turǵandyǵyn bilemiz. Bul úshin jedel járdem qyzmetin ortalyqtandyrý baǵytynda, ıaǵnı qolda bar kólikterdi tıimdi túrde qoldaný maqsatynda jumys júrgizilip jatyr. Biraq negizinen halyqtyń 50-60% qalalarda turatyndyqtan, ol turǵyda medısınalyq kólikterdiń jetýine qatysty másele joq. Damyǵan elderden góri bizde jedel járdem kóligi halyqtyń sanymen salystyrǵanda tym kóp shaqyrylady. Al damyǵan elderde az shaqyrylǵanymen birge olarda ólim jaǵdaıy da az. Al kersinshe bizde jedel járdem kóp shaqyrylǵanymen, onyń tıimdilik nátıjesi tómen», - deıdi mınıstr.

Osyǵan baılanysty mınıstrlik dárigerler brıgadasymen jumys júrgizip, jańa buıryq shyǵarylǵanyn jetkizdi.

«Men jedel járdem qyzmeti jumysynyń jańa standarty arqyly tıimdi túrde jumys atqaramyz degen oıdamyn. Eń bastysy jańa ereje tıisti orynǵa jetý máselesin jaqsartýdy kózdeıdi. Jyldyń sońyna deıin tıimdi nátıjesin baıqaımyz degen oıdamyn», - dedi Eljan Birtanov.