Búgin QR Premer-mınıstri Baqytjan Saǵyntaevtyń tóraǵalyǵymen ótken Úkimet otyrysynda QR Ulttyq ekonomıka mınıstri Tımýr Súleımenov «QR-daǵy kedendik retteý týraly» kodeks jobasymen tanystyrdy, dep habarlaıdy Qamshy.kz aqparat agenttigi úkimet basshysynyń resmı saıtyna silteme jasap.
«Sońǵy úsh jyl ishinde Eýrazıalyq ekonomıkalyq komısıa alańynda EAEO-nyń jańa Kedendik kodeksin qalyptastyrý boıynsha kólemdi jumystar júrgizilgen, ol qazir ratıfıkasıalaý rásiminen ótkizilip jatyr», - dedi T. Súleımenov.
Jańa odaqtyq kodeks aıtarlyqtaı qaıta óńdeldi, kedendik retteýdiń negizgi tásilderi qaıta qaraldy. Osyǵan oraı qoldanystaǵy ulttyq kedendik zańnamany jańa kedendik erejelerge sáıkestendirý máselesi kóterildi. Segiz aılyq jumystyń qorytyndysy – Keden kodeksiniń jańa jobasy boldy.
Jańa Keden kodeksiniń qoldanystaǵy keden zańnamasynan basty aıyrmashylyǵy – kedendik retteýdiń jańa tásili. Jańa retteýdiń negizgi qaǵıdasy – kedende bıznes úderisterdi avtomattandyrý.
Aqparattyq tehnologıalarǵa basymdyq berýden ózge, kodekste syrtqy ekonomıkalyq qyzmet qatysýshylary úshin ózderiniń shyǵyndaryn ońtaılandyrýǵa jol ashatyn birqatar múmkindikter paıda boldy.
Investorlarǵa kedendik deklarasıany tapsyrǵanǵa deıin taýarlardy shyǵarý múmkindikteri keńeıtildi. Investısıalyq jobalardy iske asyrý aıasynda ınvestorlar kelesi aıdyń 10-y kúninen keshiktirmeı, deklarasıany tapsyrý týraly ótinish negizinde taýarlardy ózderimen alyp kete alady. Sondaı-aq, endigi atalǵan normaǵa erkin qoıma, erkin kedendik aımaq, qaıta óńdeýdiń kedendik rásimderi de baǵynady.
Budan ózge, QR Keden kodeksiniń birqatar erejesi QR Salyq kodeksiniń prosesterimen úılestirilgen. Bul keden bajyn, salyqtardy esepke alý, esepteý (qaıtarý) boıynsha erejelerge, sonymen qatar bereshekti óndirip alý jáne buzýshylyqtardy joıý men tekseris nátıjeleri týraly habarlamalarǵa shaǵym túsirý erejelerine qatysty.
Jańa Kodekspen bir ýaqytta oǵan ilespeli zań jobasy ázirlendi, ol birqatar Kodekster men zańdarǵa ózgerister engizýdi qarastyrady.
Budan ózge, taýarlardy joıýdyń kedendik rásimine ornalastyrǵan jaǵdaıda memlekettik ekologıalyq saraptamany berý turǵysynan QR Ekologıalyq kodeksine ózgerister engizilip jatyr. Búdjettik kodekske avanstyq tólemder normalaryn retteý turǵysynan túzetýler engizilýde. Sonymen qatar kólik baqylaý fýnksıalaryn ótkizý jáne t. b. turǵysynan keıbir zańdarǵa túzetýler engizilip jatyr.
«Osylaısha, jańa Keden kodeksi Qazaqstanǵa tranzıttik jáne eksporttyq áleýetti paıdalanýǵa múmkindik beretinin, syrtqy ekonomıkalyq qyzmetti júrgizýdi jeńildetetinin senimdi túrde aıtýǵa bolady», - dedi T. Súleımenov.
QR Premer-Mınıstri Baqytjan Saǵyntaev memlekettik organdarǵa otyrys barysynda aıtylǵan barlyq eskertýlerdi pysyqtap, qajetti ózgerister engizý týraly tapsyrma berdi.
