Máskeýde jastar arasynda qazaq ánderiniń «Altyn kúz - 2014» festıvál-baıqaýy ótti. Máskeý, Saratov, Omby, Býrátıa, Qyrǵyzstan jáne Qazaqstannyń namysyn qorǵaǵan 30 ónerpazdyń arasynan iriktelgen 14-i vokaldyq ónerin, mýzykalyq aspaptarda oınaý sheberligin, sonymen qatar qazaq halqynyń dástúrlerin qanshalyqty biletinin ortaǵa saldy.
Uıymdastyrýshylar atap ótkendeı, sharanyń maqsaty - Reseı men Qazaqstan jastarynyń baılanysta bolýy, daryndy jastardy anyqtaý.
Qazylar alqasynyń quramyna QR eńbegi sińgen qaıratker, «A-Stýdıo» tobynyń negizin qalaǵan prodúser Baıǵalı Serkebaev, QazKSR mádenıet qaıratkeri, ánshi, halyqaralyq baıqaýlardyń laýreaty Tatána Poltavskaıa, «Mýz-TV» Reseıdiń ulttyq mýzykalyq arnasynyń bas dırektory Arman Davletárov jáne t.b. Reseı men Qazaqstannyń mýzyka álemindegi belgili qaıratkerleri kirdi.
Qazylar alqasynyń sheshimimen «Altyn kúz - 2014» baıqaýynda 1 orynǵa - Aıjan Nýsývalıeva (Qyrǵyzstan), 2 orynǵa - Erlan Túlenov (Qazaqstan), 3 orynǵa - Indıra Mambetova (Qazaqstan) ıe boldy. Saıan Dashanımaev (Býrátıa) kórermender kózaıymyna aınaldy.
«Altyn kúz - 2014» baıqaýy RF-daǵy QR Elshiliginiń, Máskeýdegi aımaqaralyq yntymaqtastyq, ulttyq saıasat jáne dinı uıymdarmen baılanys departamentiniń qoldaýymen, sonymen qatar «Moskovskıı dom nasıonalnosteı» Máskeýdiń memlekettik búdjettik mekemesi jáne MISıS UZTÝ mádenıet jáne jastar saıasaty basqarmasynyń muryndyq bolýymen uıymdastyryldy.
"QazAqparat"
Sýret: academygps.ru/
