QazSSR-diń Joǵarǵy keńesi 1991 jylǵy jeltoqsannyń 16-sy kúni tústen keıin qazaq elin táýelsiz memleket dep jarıalap, eldiń ataýyn Qazaqstan respýblıkasy dep ózgertti.
Qazaq tarıhy úshin eń qýanyshty habardyń birin halyqaralyq BAQ arqyly tikeleı efırde álemge taratý baqyty buıyrǵan jýrnalıs – sol kezde «Azattyq» radıosynda qyzmet etken Ómirhan Altyn edi.
Ol – HH-ǵasyrdyń basyndaǵy qıyn-qystaý zamanda Altaıdan Úndistan men Pákistan asyp, odan ary Túrkıaǵa jetken qazaqtardyń urpaǵy. Qazir Germanıanyń Múnhen qalasynda turatyn Ómirhan Altyn qazaq eliniń táýelsizdigin Qudaıdyń eń úlken syıy hám baǵy dep sanaıdy.
Ómirhan myrzanyń aıtýynsha, 1991 jylǵy jeltoqsannyń 16-sy dúısenbi kúni ol kezde keńsesi Múnhen qalasynda ornalasqan Azattyq radıosynyń qyzmetkerleri úshin demalys kúni bolǵan. Seısenbiden senbige deıin jumys isteıtin radıo qyzmetkerleriniń ishinen bir redaktor men bir tilshi ǵana jeksenbi, dúısenbi kúnderi jumysqa shyǵyp otyrǵan. Sol kúni redaktor – Muhabaı Engin, al jańalyqtardy daıarlap efırden oqıtyn tilshi – Ómirhan Altyn bolǵan.
«Mine, Alla taǵala qoldap, qazaq eli táýelsizdik jarıalaǵan kúni qosymsha qyzmetker retinde kúndelikti jańalyqtardy daıyndap, tikeleı efırde oqý kezegi meniki edi. Almatydaǵy tilshimizdiń Joǵarǵy keńestiń táýelsizdik jarıalaǵany týraly telefonmen bergen málimetin jańalyqtarǵa qosyp, alǵashqy habar etip, zor qýanyshpen oqyp shyqqanym esimnen ketpeıdi», – deıdi ol.
Bul týraly Muhabaı Engin myrza bylaı deıdi: “Sol kúni demalys bolýyna oraı Azattyq radıosy Qazaq Bólimin Qasen Oraltaı marqumnyń ornyna ádettegideı men basqardym. Al Ómirhan Altyn kezekshi tilshi bolatyn. 1991 jyly 16 jeltoqsan, dúısenbi kúni túski ýaqytta kópten kútken Qazaqstan táýelsizdigin jarálady degen málimet kelip tústi. Erejege saı, der kezinde bul málimetti rastap alǵannan keıin Ómirhan Altyn táýelsizdik týraly habardy daıyndap, radıodan oqyp shyqty”.
Ómirhan Altyn Qazaqstannyń táýelsizdigin halyqaralyq BAQ arqyly dúnıe júzi qazaqtaryna birinshi bolyp habarlaý buıyrǵany úshin ózin baqytty qazaq dep biledi. Bul týraly (ALMATY. Jeltoqsannyń 15-i 2006. QazAqparat. /Qýanyshbek Qarı/) Ómirhan Altynnyń QazAqparatqa bergen suhbatynda da aıtylǵan. Suhbatta: “osydan 15 jyl buryn el táýelsizdigin elden syrtta «Azattyq» radıosy arqyly jarıalaǵan Múnhen qalasynda turatyn qandasymyz Ómirhan Altyn” – dep jazypty.
Qalaı aıtsada, El táýelsizdigin tuńǵysh bolyp álemge jarálaý – kez kelgen adamǵa buıra bermeıtin baqyt. Ómirhan aǵamyz solardyń biri.
«Endi qazaq eli táýelsizdiginiń máńgi bolýyn Alla taǵaladan tileımin» deıdi ol.
Ahmetuly Beısen
