«Qamshy.kz» portalynyń «Kazaqstannyń Turǵyn úı qurylys jınaq banki» AQ baspasóz qyzmetimen birlesip qolǵa alǵan aqparattyq jumystarynyń nátıjesinde oqyrmandar kóńilindegi kóp suraqqa jaýap izdeýge múmkindik aldy. Qoǵamdaǵy eń ótkir máseleniń biri bolyp tabylatyn baspana jaıy eshkimdi beı-jaı qaldyrmaıtyny belgili. Tipti, buǵan deıin turǵyn úı qurylys jınaq júıesi týraly beıhabar bolyp kelgen oqyrmandarymyzdyń qyzyǵýshylyǵy artyp otyr. Sondaı saýaldyń biri «Turǵyn úı qurylys jınaq júıesi degenimiz ne, onyń sharttary qandaı?» degen suraq. Saýalǵa «Kazaqstannyń Turǵyn úı qurylys jınaq banki» AQ basqarýshy dırektory Erulan Jamaýbaev jaýap beredi: - Turǵyn úı qurylys jınaq júıesi degenimiz - bul turǵyn úı jaǵdaılaryn jaqsartýǵa halyqqa turaqty, derbes nesıe berý júıesi. Banktiń barlyq salymshylary onda aqsha qarajattaryn jınaqtaıtyn bir júıege biriktirilgen. Turǵyn úı zaemdary salymshylarǵa jalpy jınaqtaý júıesinen beriledi. Negizinen alǵanda, salymshylar ózderin ózi qarjylandyrady, al bank tek operator qyzmetin atqarýshy bolyp tabylady. Sondyqtan turǵyn úı zaemdary eń arzan jáne eń senimdi bolyp sanalady. Júıe sheteldik valútaly zaemdardy paıdalanbaıdy, sondyqtan da ótken jyldar dáleldep bergendeı, álemdik qarjylyq daǵdarystardan saqtandyrylǵan. Ol Qazaqstannyń barlyq azamattaryna bólip-jarýsyz (tipti kirisi tómen bolsa da) baspana máselelerin sheshý múmkindigin beretindigimen de biregeı júıe retinde tanylýda