Búginde álemde seksýaldyq zorlyq-zombylyqtyń qurbany bolǵan adamnyń sanynda shek joq. Keı adamdar basynan ótken qaıǵyly jaǵdaıyn halyqpen, qoǵammen bólisýdi jón kóredi. Alaıda kóbi aıtýdan qymsynady, jasyrady, sonyń saldarynan jalǵyzdyqta kún keshedi, psıhologıalyq aýytqýlarǵa tap bolady. Álemdik máselege aınalǵan seksýaldyq alymsaqtyqtan qutylýdyń joly búginge deıin tabylmaı keledi. Alaıda onyń qurbany bolǵan adamdardyń ómirden túńilýine bolmaıtynyn túsindiretin amaldar bar.  

Men aıtýdan qoryqpaımyn...

Amerıkalyq aktrısa  Alıssa Mılano kez kelgen adam óziniń basynan ótken qaıǵyly oqıǵasymen bólisý úshin tvıtter áleýmettik jelisinde #MeToo (#MenDe) heshtegi arqyly fleshmob jarıalady. Fleshmob AQSH pen Ulybrıtanıada keńinen taraldy.

Búginde Batystyń áleýmettik jelisi seksýaldyq alymsaqtyq jaıyn jarysa jazyp álek. Áńgimeniń tórkini gollıvýdtyq prodúser Harvı Vaınshteınmen bolǵan oqıǵadan bastalǵan. Buǵan deıin prodúserge birneshe tanymal aktrısalardy qorlady degen aıyp taǵylǵan. Olardyń qatarynda Andjelına Djolı men Gvınet Peltroý da bar.

Qorlǵanǵan qyzdardy qoldaý maqsatynda aktrısa Alıssa Mılano atalmysh fleshmobty bastady. Aktrısanyń ıdeıasy Gollıvýdtan ózge de aımaqtarǵa keńinen tarap, seksýaldyq zorlyqtyń qurbany bolǵan áıelderdiń óz qıyndyqtary jaıynda #MeToo heshtegin paıdalaný arqyly ashyq aıtýyna múmkindik týdy.

«Eger sizge seksýaldyq kúsh kórsetken bosla, #MeToo heshtegin jaýap retinde jazyńyz. Qorlyq kórgen qyzdar men áıelderdiń bári jazatyn bosla, álemdik máseleni kóterip, sheshimin tabýǵa bolady», - dep jazdy Alıssa óziniń tvıtterderdegi paraqshasyna.

Onyń jazbasyna 35 myńnan asa áıel jaýap jazdy. Alıssanyń ózi zorlyqshynyń qurbany bolǵan edi.

Keıbir áıelder heshtegtiń astyna kishigirim oqıǵalaryn jazyp jatty. Eń bastysy ár áıel ózderiniń jalǵyz emes ekendigin túsindi.

«Ol kezde meniń jasym 7-de bolǵan. Basqa eshteńe aıta almaımyn».

«Men 8-de edim. Búginde bir erkektiń qurbany bolmaǵan nemese qorqytpaǵan áıeldi tanymaımyn».

«Kóshede jalǵyz ózi ketip bara jatqan, boıy úreıge toly qyzǵa qara da, bári jaqsy bolatynyn túsindir, janynda bol, qolda».

Er adamdar da qorlanady...

Ádette, biz «seksýaldyq alymsaqtyq» jaıynda sóz qozǵaǵanda birden oıymyzǵa qurban bolǵan áıelder oralady. Alaıda er adamdar da seksýaldyq zorlyqtyń qurbany bolyp jatady. Olar bul jaıly aıtýǵa namystanyp jatady. Al nazarlaryǵńyzǵa basynan ótken sumdyq jaǵdaılardy halyqpen bólisýge bel baılaǵan batyl er adamdardyń fotosyn usynamyz

«Jaralanbaǵandar» jobasy aıasynda 2011 jylǵy taralǵan sýretterdiń avtory – Greıs Braýn. Joba maqsaty – zorlyq-zombylyqtyń qurbany tek áıelder ǵana emes, er adamdar da bolady. Greıs Braýn esimdi sýretshi áıel zorlanǵan er adamdarmen sóılesip, kamera aldynda basynan ótkenderin qaǵazǵa jazyp berýin ótindi.

«Menimen taıtalasýdyń qajeti joq. Sen de qalaısyń ǵoı muny», - dedi ol. Ol kezde meniń jasym 14-te edi, al ol 40-ta bolǵan. «Sen únińdi shyǵarasyń, men seniń janyńdy shyǵaramyn», - dedi. Jasym 22-ge tolǵanda otbasyma bar jaǵdaıdy aıtyp berdim. Baýyrlarymnyń da dál osyndaı jaǵdaıdy bastarynan ótkergenin bildim. Men bárin aıtyp, kishkene bolsa da, jeńildep qalǵan edim. Al olar ishine saqtap júrgen. Sebebi bizdi qorlaǵan bizdiń týys aǵamyz edi. Ol jalǵyzdyqta, qaıǵyryp ómirden ótti. Óz ózime kelip, bolǵan jaǵdaıdyń bárin aıtqanym úshin, ómirge qaıtadan kelgendeı boldym. Tiri adam ekenimdi sezdim».

«Osyny ýaıymdaısyń ba endi?» - dedi ol maǵan. Men árdaıym sol úshin ýaıymdaıtyn bolamyn, biraq ol meniń minezimniń kórsetkishi emes».

«Aınala múlkigen tynyshtyq. Ol meni qorlaǵanda, jasym nebári 4-te edi».

«Endi sen eshkimge kerek emessiń. Sen buzylǵansyń», - dedi zorlaýshy».

Túıin...

Joǵaryda aıtyp ótkenimizdeı, búginde zorlyqshynyń qurbany bolǵan áıleder men er adamdardyń sanynda shek joq. Zorlyqshy jazalanar, ókinishtisi áreketin júzege asyrǵan soń ǵana. Al zorlyq-zombylyqqa tap bolǵan adamnyń júreginde qara daq máńgige qalyp qoıady. Qoǵamnan alshaqtaıdy, jalǵyzdyqta kún keshedi, qaıǵysy da, muńy da ishinde qalady. Qoǵam bolyp atalmysh árekettiń qurbany bolǵan adamdardy qoldasaq, olar úshin de jańa kún týar, ómirge qaıta oralar...