Sońǵy kezderi óz áıelin sýrrogat ana bolýǵa ıtermelep júrgen er adamdardyń qatary kóbeıip keledi dep jazady Qamshy.kz aqparat agenttigi Caravan.kz-ke silteme jasap.
Internette sýrrogat ana bolamyn degen habarlamalar kúnnen kúnge artyp keledi. Keıbirin kúıeýleriniń ózi jazǵanyn kóresiń. «Jeńgetaılar» áıelderiniń denesin 9 aıǵa jalǵa berýge daıyn.
«Jaýapkershiligi mol ata-ana úshin sábıdi ekstrakorporaldy uryqtandyrý arqyly dúnıege alyp kelýge daıynmyn. Jasym 25-te. Boıym – 170 sm. Salmaǵym – 70 keli. Sulý, aqyldy, meıirimdi áıelmin. Jasandy túsikti eshqashan jasaǵan emespin. Esh jerim aýyrmaıdy. İshimdik, temekige áýestigim joq. Qyzmetim $30 000 turady jáne aı saıyn 100 000 teńge tólep turýlaryńyz qajet» dep jazylǵan habarlamalardyń birinde.
«Astanada turamyn. Ultym qazaq. Ush balam bar. Barlyǵyn tabıǵı jolmen dúnıege ákeldim. Turmystaǵy áıelmin. Joǵary bilimim bar. Boıym – 163 sm. Salmaǵym-57 keli. Salaýatty ómir saltyn ustanamyn» dep jazady Astana turǵyny.
Caravan.kz jýrnalısi ózin sýrrogat ana bolýǵa usynǵan áıelmen áńgimelesip kórdi. Jýrnalıs qarjy tapshylyǵynan sýrrogat ana bolǵysy keletin, alaıda kúıeýine aıtýǵa qorqyp júrgen áıel retinde habarlama ıesine habarlasty.
– Kúıeýim qarsy bola ma dep qorqamyn
– Meniń kúıeýim kerisinshe ózi usyndy. Oǵan enem solaı isteýge keńes beripti. Aqsha jaǵynan qysyldyq. Onyń ústine baspanaly bolǵymyz keldi. Qoryqsam da kelisimimdi berdim. Endi soǵan ókinemin. Qansha kóz jasymdy tóktim. Gormondardyń saldarynan áli kúnge deıin ózime kele almaı júrmin. Júıkem tozdy. Densaýlyǵym nasharlady.
Júkti bolǵannan keıin 7 aı úıde otyrdym. Kúıeýim men enem jaǵdaıyma qaramastan qara jumysqa saldy. Onyń anasy maǵan 5 balany jumys istep júrip dúnıege ákelgenin únemi aıtyp otyratyn.
Júktiliktiń sońǵy aılary bıologıalyq ata-ananyń úıinde turdym. Olar meniń ár qadamymdy ańdydy. Bosanǵannan keıin balany aldy da maǵan tipti taksıde shaqyrmady. Úıge avtobýspen jettim.
– Kúıeýińiz qarsy almady ma?
– Joq, onyń qoly bos bolmady.
– Úı satyp aldyńyzdar ma?
– Joq, áli kúnge deıin páter jaldap turamyz. Enem de bizben birge turady. Aqsha jumsalyp ketti. Kúıeýimniń qaryzdary bar eken. Oǵan qoqan-loqy kórsetti. Sondyqtan $10 myń dollardy soǵan berdik.
– Endi ekinshi márte mundaıǵa kelisimińizdi bermeıtin shyǵarsyz?
– Joq, endi tek analyq jasýshamdy ǵana ótkizemin.
– Kúıeýińiz jumys isteı me?
– Joq, áli jumys istemeıdi...
Telefonnyń arǵy jaǵynan er adamnyń aıqaılaǵan daýysy estildi. Osymen áńgime aıaqtaldy.
Ár qyz balasy úlken mahabbatpen turmys quryp, baqytty bolýdy qalaıdy. Ókinishke qaraı, qyzdardy áıeldikke alyp, ony úıdiń jumysy bylaı tursyn, qurylys jumystaryna da aralastyrady. Qol kóteredi. Qor basshysy Nına Balabaevanyń aıtýynsha, áıelderin dostaryna satpaq bolǵan nemese Sırıa sekildi soǵys órti órship turǵan jerlerge jynystyq quldyqqa jiberetin jaǵdaılar jıilegen.
Óz kúıeýin pyshaqtap óltirgen áıeldiń de oqıǵasyn aıtyp berdi. Turmys qurǵan áıel úıinde kirpish tasý, sylaq sekildi aýyr jumystardy jasaǵan. Al birdeńeni durys jasamasa kúıeýi ony urǵan. Áıeliniń jumysy kóńilinen shyqpasa judyryǵyn ala júgirgen. Osyndaı urys keristiń birinde áıel shydamaı kúıeýin pyshaqpen urǵan. Áıel 5 jylǵa bas bostandyǵynan aıyryldy.
