Jemqorlyq pen paraqorlyq álemdik deńgeıde úlken máselege aınalyp otyr. Memleket ekonomıkasynyń berekesin qashyratyn indet dese de bolar. Qazirgi tańda qoǵamda beleń alyp turǵan bul máseleni boldyrmaý úshin bılik te, jeke adamnyń ózi de atsalysýy qajet. Tipti memleket basshysy Nursultan Nazarbaevtyń ózi «jemqorlyqqa qarsy kúrestiń kúsheıetinin aıtqan. Alaıda sol jemqorlyq áreketten bıliktegi, mınıstrliktegi sheneýnikterdiń ózi bas tartpaı otyr. 2017 jyldyń ózinde birneshe laýazymdy qyzmet ıeleri para berý, papa alý isi boıynsha ustaldy. Qamshy.kz aqparat agenttigi 2017 jyly paramen nemese basqa da qylmystyq ister boıynsha ustalǵan sheneýnikterdi tizip shyqty.
Jemqorlyq boıynsha ustalǵandar
Qýandyq Bıshimbaev
2016 jyldyń mamyrynda Ulttyq ekonomıka mınıstri bolǵan Qýandyq Bıshimbaev jyly ornynda uzaq otyrǵan joq. 1 jyldan keıin-aq mınıstr qamaýǵa alyndy. Onyń sebebi – jemqorlyq.
2017 jyldyń qańtarynda QU Ulttyq ekonomıka mınıstrligin basqarǵan Qýandyq Bıshimbaevtyń ustalǵany habarlandy. «Bıshimbaev top bolyp, aldyn ala kelisim jasaý arqyly asa iri kólemde birneshe ret para alyp otyrǵan. Zańsyz alǵan qarajatty Bıshimbaev óz qajetine jaratqan», - dep habarlaǵan sol ýaqytta jemqorlyqqa qarsy qyzmettiń ókilderi. Sóıtip Bıshimbaev QR QPK 128-babyna sáıkes, Astana qalalyq İİD ýaqytsha ustaý oqshaýlaǵyshyna qamaldy. Keıin onyń 15 jylǵa sottalýy múmkin ekeni aıtyldy.
Qazanda Bıshimbaev qylmystyq is boıynsha 1,2 mlrd teńge kóleminde ótemaqy tóledi. Alaıda tergeý jumystary áli de jalǵasyp jatyr, naqty úkim shyqqan joq.
Nurlan Moldataev
41 mıllıon teńge jymqyrdy degen kúdikpen qarashada «Qazaqavtojol» RMK Qostanaı oblystyq fılıalynyń basshysy Nurlan Moldataev ustaldy.
Sybaılas jemqorlyqqa qarsy is-qımyl ulttyq búrosynyń Qostanaı oblysyndaǵy departamenti QR QK 189-baby 4-bólimi 2-tarmaǵynda (Asa iri kólemde jymqyrý) qarastyrylǵan qylmysty jasady degen kúdikpen Moldataev Rýdnyı qalasyndaǵy ýaqytsha ustaý abaqtysyna qamalǵan.
Qanat Sultanbekov
«Qazaqstan ınjırıng» basqarma tóraǵasynyń burynǵy orynbasary Qanat Sultanbekov te para aldy degen kúdikpen qamaýǵa alynǵan.
Ol qylmystyq quqyq buzýshylyq jasaǵany úshin QR Qylmystyq kodeksiniń 366-babynyń 4-bóligi boıynsha («Para alý») aıyptaldy. Ár túrli jetekshilik qyzmetteri barysynda Sultanbekov 1 mlrd teńge kóleminde para alǵan. 2017 jyldyń 4 jeltoqsanynda jemqorlyqqa qatysty qylmysy úshin ol 10 jylǵa bas bostandyǵynan aıyryldy.
Qanat Sultanbekov "Qazaqstan ınjınırıń" vıse-prezıdenti qyzmetin 2015 jylǵy aqpannan bastap atqarǵan.
Rashıd Amanjolov
Sáýirde sot «Azamattarǵa arnalǵan úkimet» memlekettik korporasıasy basqarma tóraǵasynyń orynbasary Rashıd Amanjolovty qamaýǵa alý týraly sanksıa bergen.
Alaıda qandaı bap boıynsha aıypty bolǵany habarlanbady. Tek mamyrda Ulttyq qaýipsizdik komıteti Rashıd Amanjolovqa qatysty QR Qylmystyq kodeksiniń 367-babynyń 4-bóligi boıynsha – «Para berý» sotqa deıingi tergeý jumystaryn júrgizip jatqanyn málimdedi.
Larısa Pak
3 shilde, Jemqorlyqqa qarsy qyzmet Densaýlyq saqtaý mınıstrligi Farmasıa komıtetiniń tóraǵasy qyzmetin atqarýshy L.Pakty, Pavlodar oblysy boıynsha Farmasıa departamenti jetekshisi Z.Qajynovany, Farmasıa komıtetiniń Ońtústik Qazaqstan oblysy boıynsha bas mamany P.Imamhodjaevty jáne bas sarapshy D.Ibraevany júıeli túrde jalpy somasy 10 mln teńgeden asatyn para alǵany úshin ustady.
2017 jyldyń 30 qarashasynda Astana qalasy Almaty aýdanynyń №2 aýdandyq sotynda Larısa Pakqa qatysty úkim shyǵardy. Ol 2018 jyldyń 4 qańtaryna deıingi ýaqytta úı qamaqta otyrady.
Memlekettik qupıany zańsyz jarıa etken
Baǵlan Maılybaev
2017 jyldyń qańtarynda QR Prezıdent ákimshiliginiń burynǵy qyzmetkerleri ustaldy. Ol QR Qylmystyq kodeksi 185-baby 1,3-bóligine sáıkes («Memlekettik qupıalardy zańsyz jınaý, taratý, jarıa etý» qylmystardy jasady degen kúdikpen qamaýǵa alynǵan.
QR Qylmystyq-prosestik kodeksiniń 128-babyna sáıkes UQK Tergeý ızolátoryna qamaýǵa alyndy.
Aqsha jymqyrǵan
Rýslan Erdenaev
2017 jyldyń qańtarynda BJZQ basqarma tóraǵasy Rýslan Erdenaevqa ózgeniń múlkin zańsyz ıelenip, óz qajetine jumsady degen kúdik taǵyldy. Kúdikke ilikkender eki aıǵa qamaýǵa alyndy. Odan bólek, "BZJQ" qarjy táýekeli basqarmasynyń basshysy M.Baztovqa, "AlataýMunaıAltyn" AQ qadaǵalaý keńesiniń tóraǵasy B.Kenjebaevqa, «Býzgýl Aýrým» JSHS dırektory A. Naızaǵarınǵa qatysty sanksıalaý sharalary qoldanyldy.
Qarashada sotqa deıingi tergeý barysynda Erdenaevtyń óz kinásin moıyndap, bolǵan iske ókinish bildirgeni habarlanǵan.
Rýslan Erdenaev memleketke 5 mıllıard shyǵyn keltirgeni jáne para alǵany úshin aıyptalyp otyr.
Maksım Kasatkın
Qarjyny jymqyrý faktisi boıynsha ustalǵandardyń qatarynda «SK-Farmasıanyń» basqarma tóraǵasy Maksım Kasatkın de bar.
Resmı derekterge súıensek, Kasatkın tender kezinde "KazSıbFarmaseıa" kompanıasynyń múddesi úshin basqa básekelesterdiń ótinishterin qaıtaryp otyrǵan. "KazSıbFarmaseıa" kompanıasy dári-dármekterdi densaýlyq saqtaý mınıstrligi bekitken eń joǵarǵy 15 paıyzdyq kóterme baǵadan qymbatqa satqan.
Tergeý boljamynsha, "SK-Farmasıa" men KazSıbFarmasıa" basshylary 2015 jyldan bastap 1,8 mıllıard teńgeden astam qarjy jymqyrǵan.
Eskendir Erimbetov
2017 jyldy «BTA banki isi» boıynsha tórt adam qamaýǵa alyndy. Korrýpsıaǵa qarsy is-qımyl ulttyq búrosynyń aqparaty E.Erimbetov, V.Sokolenko, D.Pestov jáne M.Zorovty ulttyq búro men UQK-niń vedomstvoaralyq jedel tergeý toby 13 qarashada ustaǵanyn habarlady.
Ustalǵandarǵa qatysty "BTA banki" basshylyǵynyń aryzymen Qylmystyq kodekstiń 189-baby ("jymqyrý") jáne 193-baby ("zańdastyrý") boıynsha sotaldy tergeý isi bastalǵan. "BTA bank" tórt azamatty banktiń burynǵy basshysy Muhtar Áblázov "jymqyrǵan 500 mıllıon dollardan astam qarjyny" "jylystatyp, zańdastyrýǵa qatysy bar" dep kórsetken.
Tergeýshiler buǵan qosa E.Erimbetovti "óziniń "SKY SERVISE" kompanıasy arqyly 1 mıllıard teńge búdjet qarjysyn jymqyrdy" dep kúdiktengen.
