Keshegi ótken kúnderdiń bári sátti emes,

Sátsizdikten de izdeımin janym, tátti eles.

Saǵynysh degen ǵajaıyp ǵumyr keshemin,

Jetýge saǵan amalym bolmaı, átteń, esh.

Bulyńǵyr tartyp, bultty kún de tym baıaý,

Ótpeıdi. Ótse, otyram oımen túnde oıaý.

Sarýaıymmenen, sarǵaıýmenen kún keship,

Sanama meniń sińip barady bir boıaý.

Tolqyǵan júrek, balqyǵan sezim týdyryp,

Ol kúnder ketti kirpikke aýyr muńdy ilip.

Malynyp sherge, saǵynyp sen de júrmisiń,

Janyńdy, qarǵam, jasyna kózdiń jýdyryp.

Ketse de meıli aspannyń asty tarylyp,

(Serýen quram, tátti eles, seni saǵynyp).

Qanatyn kergen qara túnderden izdeımin,

İzdeımin anaý aspanǵa sansyz sham ilip.

Juldyzdy aspanym jymyń qaqqanda jaqyn kep,

Juldyzdan qurap jazamyn óleń aqyn bop.

Qalaıda, janym, seni umytýǵa tıispin,

Al saǵynbaýǵa haqym joq!

Qalqaman SARIN