Shymkentte ótken toıdaǵy erekshe torttyń fotosy men vıdeosy Internetti kezip ketti. Jeli qoldanýshylary kondıterlik ónimniń kólemine tańdaı qaǵyp, toıdyń sán-saltanatyn qyzý talqylady. 21 mıllıon teńgege tort jasatqan kim boldy eken? Qamshy.kz aqparat agenttigi ashyq derekkózderden alynǵan málimetterdi usynady.
Eske sala ketetin bolsaq, osydan biraz ýaqyt buryn Shymkent qalasynda ótken toıdaǵy tort áleýmettik jelide qyzý talqylanǵan edi.
Biletinderdiń aıtýynsha, shańyraq kótergen jastar – belgili kásipker Qaırat Satybaldynyń qyzy Arýjan men Shymkenttiń áıgili olıgarhy Serikjan Seıitjanovtiń nemeresi Ámirjan.
Qalyńdyqtyń ákesi Qaırat Satybaldy 1970 jyly Almaty qalasynda dúnıege kelgen. Ol 1990 jyly I.S. Qonaev atyndaǵy Almaty joǵary jalpy áskerı komandalyq ýchılıshesin «ınjener-mehanık» mamandyǵy boıynsha támámdaǵan.
Osydan soń Qaırat Satybaldy Túrkistan áskerı okrýginiń bir bólimshesinde qyzmet etti. Munda ol aldymen vzvodty, keıin rotany basqardy. 1992 jyly ulttyq qaýipsizdik organdaryna kelip, Sybaılas jemqorlyqqa qarsy kúres basqarmasy bastyǵynyń orynbasary qyzmetin atqardy. Sol aralyqta komıtettiń joǵarǵy kýrsyn bitirdi. Qaırat Satybaldy UQK-da alty jyl qatarynan jumys istedi. Osy ýaqyt ishinde Abaı atyndaǵy memlekettik ýnıversıtette «zańger-quqyqtanýshy» mamandyǵyn alyp shyqty.
1998 jyldyń ortasynda Qaırat Satybaldy Astana qalasy ákiminiń orynbasary bolyp taǵaıyndalady. Odan keıingi jyldary ol «Qazaqoıl» kompanıasynyń vıse-prezıdenti, UQK kadrlary departamentiniń dırektory, «Qazaqstan temirjoly» kompanıasynyń vıse-prezıdenti, «Dúnıe» korporasıasy» AQ dırektorlar keńesiniń tóreǵasy laýazymdaryn atqardy. 2010 jyldyń mamyr aıynan bastap «Nurotan» partıasynyń hatshysy qyzmetinde.
2015 jylǵy aqparattarǵa súıensek, Qaırat Satybaldy «Kaspi Bank» AQ, «Qazaqtelekom» AQ, «Ámir LTD» JSHS, «Dúnıe-Agro» JSHS, «Dúnıe» Korporasıasy JSHS, «Dúnıe-Kúzet» JSHS jáne «Alatau Capital Invest» JSHS aksıalarynyń úleskeri eken.
Kúıeý jigittiń atasy Serikjan Seıitjanov – Ońtústik Qazaqstan oblysy Otyrar aýdany Shilik aýylynyń týmasy. 1971 jyly Qazaq hımıa-tehnologıa ıntıtýtyn «ınjener-qurylysshy (tehnolog)» mamandyǵy boıynsha aıaqtaǵan. Úıli-barandy, eki uly, bir qyzy bar. Eńbek jolyn «Shymkentpromstroı» kombınatynda tres materıaldarynyń sheberi bolyp bastaǵan. Keıin seh bastyǵy, bas ınjener, zaýyt dırektory sıaqty basshylyq qyzmetterge deıin kóterildi . Ol jerde bas-aıaǵy 16 jyl jumys istedi. Osy kezeńde kandıdattyq pen doktorlyqty qorǵap, sementti almastyratyn tehnologıa oılap tapty. Seıitjanovtyń bul jańalyǵy kombınatty aýyr daǵdarystan alyp shyqty.
Serikjan Seıitjanov 1994 jyly Ońtústik Qazaqstan oblysy máslıhatynyń depýtaty, 2000 jyldardyń basynda «SAUTS-OIL» munaı kompanıasynyń prezıdenti boldy. 2008 jyly ınovasıalyq sement zaýytyn saldy. Sol jyly Prezıdent Nursultan Nazarbaev bıznestiń áleýmettik jaýapkershiligi baǵdarlamasy aıasynda «Jyldyń úzdik áleýmettik jobasy» nomınasıasyn jeńip alǵany úshin «Paryz» altyn músinshesin tapsyrdy.
