QR Mádenıet jáne sport mınıstrligi Tilderdi damytý jáne qoǵamdyq-saıası jumystar komıteti tóraǵasynyń orynbasary Ǵalymjan Meldeshov «QazAqparat» HAA tilshisiniń suraqtaryna jaýap bere otyryp, latyn álipbıi boıynsha túsindirý jumystaryna blogerlerdi jumyldyrýǵa qatysty kópshilikke taralǵan aqparat qyzmettik qateliktiń saldarynan týyndaǵanyn habarlady, dep jazady Qamshy.kz aqparat agenttigi.
«BAQ-ta jarıalanǵan aqparattyń arqasynda kelesi másele anyqtaldy, «Elektrondyq úkimet» portalynda Qazaq tili álipbıin latyn grafıkasyna kezeń-kezeńimen kóshirý boıynsha 2025 jylǵa deıingi merzimge arnalǵan is-sharalar josparynyń maquldanbaǵan jobasy jarıalanǵan. Jurtshylyqqa áleýmettik jelilerde túsindirý jumystaryn júrgizý úshin qarjy bólinbegenin jetkizgimiz keledi», - dep atap ótti Mádenıet jáne sport mınıstrliginiń qyzmetkeri.
Sondaı-aq, Meldeshov qatelik jibergen vedomstvo qyzmetkerleriniń jaýapkershilikke tartylatynyn, al bekitilgen Jospardyń jobasy taıaý kúnderi «Elektrondyq úkimet» onlaın-portalynda jarıalanatynyn málim etti.
Aıta keteıik, Qazaqstan elektrondy úkimetiniń saıtynda 2025 jylǵa deıin qazaq tilin latyn álipbıine kezeń-kezeńimen kóshirý boıynsha is-sharalar josparynyń jobasy jarıalan.
Qujatqa sáıkes, latyn qarpine kóshý úsh kezeń boıynsha ótedi:
birinshi — 2018-2020 jyldar;
ekinshi — 2021-2023 jyldar;
úshinshi — 2024-2025 jyldar.
Áleýmettik jelilerde blogerlerdi tartý jolymen túsindirý jumystaryn júrgizýge 462 mıllıon 600 myń teńge jumsaý josparlanǵan. Oǵan Qazaqstan Respýblıkasy mádenıet jáne sport mınıstrligi jaýapty bolatyny habarlanǵan.
