Birneshe kún bederinde kásipqoı bokstan nápaqasyn aıyryp júrgen meksıkalyq Saýl Alvarestiń klenbýterolmen ustalyp qalǵany jaıly aqparat ǵalamtor keńistigin jaılap úlgerdi. Ruqsat etilmegen bul preperat týraly ábden oqyp, zerdelep, qanyqqan bolarsyz. Endeshe dámi ketken qazyny kóp shaınamaı, GGG-Canelo arasyndaǵy ekinshi shaıqasqa klenbýterol kedergi bola ma degen saýalǵa jaýap izdep kórsek.

Birinshiden, Kanelonyń bıznes-ımperıa ekenin aıta ketken jón. Kim ne dese o desin, biraq Saýl Alvares – búgingi kásipqoı boks áleminiń pasporty. HBO sekildi alpaýyt telearna úshin de, boks uıymdary úshin de Alvares – And taýynyń ushar bıik shyńy. Al qaı tarapqa bolsyn qyrǵyn aqsha túsiretin, jankúıerler bazasy ábden qalyptasqan, naǵyz bıznes-jobany túp-tamyrymen kesip tastaý kimge tıimdi? Kanelonyń esebinen aqsha taýyp otyrǵan barlyq tarapqa tıimsiz. Qandaı aýyr qylmyspen ustalsa da, basqa-basqa, meksıkalyqtar úshin bári keshirimdi. Óıtkeni kásipqoı boks álemi atalatyn tórt buryshtyń jartysyn meksıkalyqtar ustap tur. Meıli, fanattar áskeri jaǵynan, maqul, boks uıymdary tarapynan bolsyn... Iá, sanamalaıyq pa? Búkil álemdik boks keńesi (WBC), búkil álemdik boks asosıasıasy (WBA) sekildi alpaýyt uıymdar Maýrısıo Sýleıman men Hılberto Mendosonyń qolynda turǵanda Kanelonyń jolyna kim kedergi tastar tastaı almaq? Eshkim...

Ekinshiden, Alvares kóshede júrgen boksshy nemese «jolaýshy» (popýchık) chempıon bolǵan emes. Onyń ótkizgen jekpe-jekteriniń tiziminen kimderdi kóresiz? Manı, ıaǵnı kishi Floıd Meıvezer, kóptegen bylǵary qolǵap sheberi úshin óte yńǵaısyz Erıslandı Lara, Ostın Traýt... Qysqasy, top boksshylar jetkilikti. Munyń ishinde Saýl tek Floıdqa ese jibergenin bilemiz. Al jankúıerler úshin jaǵymyz persona bola tura kásipqoı bokstyń koroline aınalǵan Meıvezer mansabyn aıaqtaǵan soń Alvares jeke-dara bıznes jobaǵa aınaldy. Qandaı kásipqoı boks uıymy «saýyn sıyrdan» aırylǵysy keledi? Eshqaısysy. Bul dáleldeýdi qajet etpeıdi.

Úshinshi jáne eń basty argýmentimiz, Golovkın – Alvares arasynda sheshimin tappaǵan daý bar. Iá, birinshe jekpe-jekte qazaqstandyq boksshy basymdaý kóringen. Alaıda «Golden boy» promoýterlik uıymymen, Adelaıda Berd sekildi «suńǵyla» tóreshiler tandemimen jáne Saýl Alvarespen sharshy alań ishinde jáne syrtynda judyryqtasqan Genaǵa ońaı soqqan joq. Aıtalyq, Alvares chempıon bolyp, Golovkın úmitker sanalǵanda áıtip-búıtip jeńisti meksıkalyqqa ápere salar edi. Tipti, birinshi shaıqas kóp adamnyń kókeıinde kúmán qaldyrdy. Barlyq jaǵynan áıgili Oskar De La Hoııanyń (Alvarestiń promoýteri) aıtqanyna kónip, aıdaýyna júre salatyn Tom Leffler (Golovkınniń promoýteri) astyrtyn teń nátıjege kelisip alýy da bek múmkin. Ony Golovkınniń jattyqtyrýshysy Abel Sanches te bilýi yqtımal. Tek Gena bilmese kerek... Strategıany bapker qurady ǵoı. Sondyqtan biz sál basqashalaý shaıqas kórdik...  Osyndaı oı da mıdyń dálizin kezip ketetini bar. Kim bilsin? Birinshi jekpe-jek, qalaı desek te, jumbaq bolyp qaldy. Jurt jumbaqtyń sheshilgenin qalaıdy. Tek fanattar emes, búkil boks áleminiń maıtalmandary. Sol sebepti ekinshi kezdesý naǵyz kasalyq aıqasqa aınalmaq. Bul promoýshn úshin de, telearna úshin de, boksshylar úshin de asa mańyzdy. Endi osyndaı kezdesýdiń aldyna qaıdaǵy bir klenbýterol kedergi bola alady dep oılaısyz ba? Joq! Klenbýterol – tek qosymsha ıntrıga.

Kezinde Erık Morales pen Fransısko Vargastyń boıynan tabylǵan klenbýterol olarǵa túk te kesirin tıgizbegen bolatyn. Morales te, Vargas ta – ǵalamat boksshylar. Áıtkenmen, aty atalǵan bylǵary qolǵap sheberleri dál Alvares sekildi «saýyn sıyr» bola almady. Endi oılańyz, Morales, Vargas aınalyp ótken dopıng daýy Alvarestiń aldyndaǵy alynbaıtyn asý ma? Ezýge kúlki úıiriledi. Alvaresti, qajet bolsa, VADA da, basqa da aqtap alýǵa tas-túıin daıyn. Endeshe bizge Alvarestiń jazalanýy múmkin emesteı kórinedi. Soǵan qaraǵanda, Qazaqstan ýaqytymen 6-mamyrdy kútetin túrimiz bar. Mega shaıqas merzimi tym taıaý. Úmit basym, kúdik kemshin. Biz Genaǵa senemiz. Siz she?

Tabıǵat ABAILDAEV