Almatynyń 49,5 myń turǵyny jumyssyz júr. Bul týraly búgin Óńirlik komýnıkasıalar qyzmeti habarlady.

Almaty qalasynyń Statısıka departamentiniń basshysy B.Qarǵulovtyń aqparatynsha, 2017 jyldyń 4 toqsanynda 15 jas jáne odan joǵary ekonomıkalyq belsendi halyq (jumys kúshi) sany 938,4 myń adamǵa jetip, ótken jyldyń sáıkes kezeńimen salystyrǵanda 22,8 myń  adamǵa (2,5%)   ósti. Ekonomıkalyq belsendilik deńgeıi — 68,2 %.

Ekonomıkada jumyspen qamtylǵandar ótken jyldyń sáıkes kezeńimen salystyrǵanda 22,2 myń adamǵa (2,6 paıyz) ósip, 888,9 myń adamdy qurady.

Jumyspen qamtylǵan halyq sanynyń 820,3 myń adam nemese 92,3 % jaldamaly qyzmetkerler,  68,6 myń adam  nemese 7,7 % óz betinshe jumyspen qamtylǵan halyq sanyn qurady. 

Jumyssyzdyq deńgeıi 5,3 % nemese 49,5 myń adamdy qurady,-dep atap aıtty departament basshysy.

2017 jyldyń 4 toqsanynda 15 jas jáne odan joǵary ekonomıkalyq turǵydan enjar halyq sany (jumys kúshi quramyna kirmeıtin) 437,5 myń adamdy qurady, 2016 jyldyń 4 toqsanymen salystyrǵanda 2 %-ǵa nemese 8,7 myń adamǵa óskeni baıqalady.

2017 jyldyń qańtar–jeltoqsan aılarynda bir qyzmetkerdiń ortasha aılyq ataýly jalaqysy (shaǵyn kásiporyndardy eskermegende) Almaty qalasy boıynsha 188 368 teńgeni qurady, ataýly jalaqy ındeksi 5,5 paıyzǵa ósip, al  naqty jalaqy ındeksi 98,5  paıyzdy qurady.

Neǵurlym joǵary jalaqy tólenetin jaldamaly qyzmetkerler qarjy qyzmetindegi qyzmetkerler bolyp qalady - 398 030  teńge. 

Tómengi jalaqyny densaýlyq saqtaý salasyndaǵy (125 428 teńge) jáne  aýyl, orman jáne balyq sharýashylyǵy salalaryndaǵy (110 162 teńge) jaldamaly qyzmetkerler alady,-dep baıandady ol.