2017 jyldyń qorytyndysy boıynsha Aqtóbe oblysynda ortasha jalaqy 7,3%-ke ósip, 126,1 myń teńgeni qurady. Naqty jalaqynyń ósý qarqyny boıynsha aımaq Qazaqstannyń óńirleri arasynda jetekshi orynǵa ıe boldy, dep habarlaıdy Qamshy.kz aqparat agenttigi Aqtóbe oblysy ákiminiń baspasóz qyzmetine silteme jasap.

Bul týraly oblys ákimi Berdibek Saparbaevtyń tóraǵalyǵymen ótken jıynda Aqtóbe oblysy Eńbek ınspeksıasynyń basshysy Mırbolat Raımqulov málimdedi.

Jıyn barysynda birneshe máseleler qaraldy. Solardyń biri - Aqtóbe kásiporyndarynyń óndiris prosesterin turaqtandyrý jáne jumysshylardyń eńbek quqyqtaryn qamtamasyz etý týraly memorandýmdardyń oryndalýy.

Birneshe jyl boıy jergilikti bılik organdary óńirdegi barlyq iri jáne orta kásiporyndarmen osyndaı memorandýmdar jasasty. Arnaıy qurylǵan jumys toby olardyń oryndalýyn qadaǵalaıdy. Ótken jyly qabyldanǵan sharalar nátıjesinde 53 iri kásiporyndar men servıstik kompanıalarda jalaqy 7% -dan 20% -ǵa deıin kóterilip, kásiporyndarda memlekettik merekeler kezinde syıaqylar tólep otyrdy.

Aǵymdaǵy jyldyń qańtar aıynan bastap oblysta 4771 memorandýmǵa qol qoıyldy, 500-ge jýyq kásiporyndar jalaqyny kóterý týraly mindetteme aldy.

Oblys ákimi memorandýmdardyń oryndalý máselesin turaqty baqylaýda ustaý týraly tapsyrdy.

- Oblystyń kásiporyndarynda kelisimderdiń saqtalýyna baılanysty turaqty jaǵdaı saqtalýda, qyzmetkerlerge tólenetin jalaqy jáne áleýmettik tólemder ýaqtyly tólenedi. Eńbekaqy mólsherin arttyrý boıynsha ásirese óndiris qyzmetkerleriniń eńbegine sondaı-aq eń tómengi jalaqy alatyndarǵa aqy tóleý jumysy jalǵasýy kerek», - dep atap ótti Berdibek Saparbaev.