Búgin Astanada Qazaqstan Respýblıkasy men Mońǵolıa arasynda sottalǵandardy berý týraly shartqa qol qoıý rásimi ótti, dep habarlaıdy Qamshy.kz aqparat agenttigi QR Bas prokýratýrasynyń baspasóz qyzmetine silteme jasap.

Shartqa Bas Prokýror Qaırat Qojamjarov pen Qazaqstan Respýblıkasyndaǵy Mońǵolıanyń Tótenshe jáne Ýákiletti Elshisi Lývsangıın Battýlga qol qoıdy.

Halyqaralyq qujat eki eldiń azamattaryna shetelde qylmys  jasap,  bas bostandyǵynan aıyrylǵan jaǵdaıda jazany óz elinde óteýge múmkindik beredi. Bul óz kezeginde sottalǵan Qazaqstan jáne mońǵol azamatyna qoǵamǵa tez beıimdelýge kómektesedi.

Osyǵan uqsas halyqaralyq kelisimder Qazaqstan Respýblıkasy Konstıtýsıasynyń 11-babynyń talaptaryna sáıkes jasalady jáne óz azamattaryna el ishinde, sonymen qatar shet elderde qamqorlyq jasaıtyna  kepildik beredi.  

Atap ótetin jaıt, Qazaqstan qylmys jasaǵandardy berý, qylmystyq jaýapkershilikke tartý nemese úkimdi oryndaý úshin, sondaı-aq qylmystyq ister, azamattyq-quqyqtyq qatynastar jáne quqyqtyq kómek boıynsha Mońǵolıamen shart jasasqan.

Nátıjesinde Mońǵolıa Qazaqstan úshin eki el azamattarynyń quqyqtary men múddelerin qorǵaý, qylmyspen kúres, zańdylyq pen quqyqtyq tártipti qamtamasyz etý salasynda tıimdi qarym-qatynas jasaýǵa qajetti barlyq halyqaralyq-quqyqtyq qory qurylǵan kezekti eldiń biri boldy.