Tanymal Boxrec.com saıty qazaqstandyq bylǵary qolǵap sheberi Gennadıı Golovkınniń 5-shi mamyrǵa josparlanǵan jekpe-jeginiń ótetin jerin atady. Bul jaıynda Qamshy.kz aqparat agenttigi Qsport.kz portalyna silteme jasap habarlaıdy.
Aıta keteıik, Gennadıı Golovkın 5-shi mamyr kúni Saýl Alvarespen Las-Vegas qalasyndaǵy T-Mobile Arena sport kesheninde jekpe-jek ótkizý kerek bolǵan. Alaıda «Kanelo» dopıng daýyna baılanysty kezdesýden bas tartty.
Endi GGG kelesi jekpe-jegin AQSH-tyń Kalıfornıa shtatynda, Los-Andjeles qalasyna qarasty Karson qalasynda ótkizedi. Otandasymyz 27000 adam syıatyn StubHub Center arenasynda judyryqtasady.
Eske salaıyq, Golovkınmen qarymta kezdesýge eki aı qalǵanda Alvarestiń qanynan klenbýterol atty dopıng tabylǵan. Meksıkalyqtyń komandasy muny zararly etti tamaqqa paıdalanýmen baılanystyrdy. Degenmen Nevada shtatynyń Atletıkalyq komısıasy Alvaresti ázirge jekpe-jekterden shettetti. Gennadıı Golovkın men Saýl Alvares arasyndaǵy alǵashqy jekpe-jek 2017 jyldyń 17 qyrkúıeginde ótip, teń nátıje tirkelgen bolatyn.
Qazirgi tańda Gennadıı Golovkınmen jekpe-jek ótkizýge bes boksshy úmitti. Alaıda eshqaısysynyń esimi ázirge atalǵan joq.
