2019 jylǵy halyq sanaǵyn zamanaýı aqparattyq tehnologıalardy paıdalaný arqyly ótkizý josparlanyp otyr. 

Táýelsiz Qazaqstan tarıhynda úshinshi ret jalpyulttyq halyq sanaǵy bolmaq. 2019 jylǵy halyq sanaǵy qalaı ótedi? 2009 jylǵy qaıshylyqtar qaıtalanbaı ma? Sanaqqa qansha qarjy bólinedi? Qamshy.kz aqparat agenttiginiń saýalyna QR Ulttyq ekonomıka mınıstrliginiń Statısıka komıteti jaýap berdi.

Mınıstrliktiń sózinshe, el turǵyndary ınternet arqyly onlaın rejimde elektrondy sanaq paraqtaryn toltyrady.

«Saýalnama júrgizýshi men saýalnamaǵa jaýap berýshi arasyndaǵy baılanys planshet nemese planshetti qoldaný múmkindigi bolmaǵan jaǵdaıda qaǵaz jetkizgishti paıdalaný arqyly ornaıdy», - delingen mınıstrliktiń jaýabynda.

2019 jyly halyq sanaǵyn uıymdastyrý men júrgizý úshin respýblıkalyq búdjette kózdelgen qarajat sheginde mynadaı qyzmetkerler tartylady:

-eńbek sharty boıynsha ulttyq sanaqtarǵa daıyndyq jáne ótkizý jónindegi basshy;

-eńbek sharty boıynsha ulttyq sanaqtarǵa daıyndyq jáne ótkizý jónindegi nusqaýshy;

-óteýli qyzmet kórsetý sharty boıynsha ulttyq sanaqtarǵa daıyndyq jáne ótkizý jónindegi nusqaýshy;

-óteýli qyzmet kórsetý sharty boıynsha ıntervúer.

Bul qyzmetkerler QR-nyń halyqty jumyspen qamtý ortalyqtarynda tirkelgen jumyssyz azamattardan quralmaq.

Aıta keteıik, Qazaqstanda sońǵy jalpyulttyq halyq sanaǵy 2009 jyly 25 aqpan men 6 naýryz aralyǵynda ótti. Ol sanaqtyń qaıshylyǵy kóp bolǵan edi.  2009 jyly aqpannyń 24-nen 25-ne qaraǵan túndegi esepteý barysynda Qazaqstan turǵyndarynyń sany 16 mıllıon 4 myń 800 adam bolǵan. 2010 jyldyń 11 qańtarynda sol ýaqyttaǵy statısıka agenttiginiń tóraǵasy Álıhan Smaıylov Qazaqstan halqynyń sany 16 mıllıon 196 myń 800 adamdy quraǵanyn habarlaǵan.

Eldegi qazaqtar sany alǵashynda 67% dep kórsetildi. Odan keıin 63,1% delinse, 2010 jyly 1 qańtarda respýblıkadaǵy qazaqtardyń úlesi 63,6%-dy quraǵany habarlandy. Iaǵnı túsiniksiz sebeptermen eldegi qazaqtardyń sany kemigen. Al 67% nemese 63%-dyń aıyrmashylyǵy sanaqshylardyń qateliginen dep aıtyldy. Bir qyzyǵy, qatelik tek qazaqtardyń sanynan ketken.

BUU Bas assambleıasynyń 1960 jylǵy sheshimine sáıkes, eldegi tıtýldy ulttyń úlesi 67%-dan assa, ol kópultty memleket bolyp sanalmaıdy.

2009 jyly halyq sanaǵyna 1 mıllıard 144 mıllıon teńge bólingen. Sonyń tek 379 mıllıon teńgesi ǵana belgilengen maqsatqa jumsaldy. Jymqyrylǵan 764,8 mıllıon úshin statısıka agenttiginiń tóraıymy Anar Meshimbaevaǵa, onyń orynbasarlary Nurman Baıanov pen Birlik Meńdibaevqa jáne kásipker Serik Turjanovqa qatysty qylmystyq is qozǵalǵan.

Al 2019 jylǵy Halyq sanaǵyna jumsalatyn qarjy mólsherin mınıstrlik jaýapsyz qaldyrdy.