Densaýlyq salasynyń ótken jylǵy jumysyn qorytyndylaǵan alqa ótti. Oǵan Almaty oblysy ákiminiń orynbasary Jaqsylyq Omar basshylyq etti. Jıynda oblystyq densaýlyq saqtaý basqarmasynyń basshysy Baýyrjan Ysqaq sóz aldy.

– 2017 jyly oblystyq densaýlyq saqtaý salasyna bólingen qarjy 82,8 mlrd. teńgeni qurady. Onyń 74,7 mlrd. teńgesi respýblıkalyq, 8,1 mlrd. teńgesi jergilikti búdjet qorjynynan bólingen, – dedi ol. Ana ólimi jıi oryn alǵan Jambyl aýdany ákiminiń orynbasary Dastan Shaltabaev ornynan turǵyzyldy. Ol birden jalany o dúnıelik bolyp ketken ananyń ózine japty.

– Ol bul balany nekesiz tappaq bolǵan. Bizdiń jaqta bir adammen azamattyq nekede turǵan. Ár jerden kelip, árkimnen bala tapqandardyń densaýlyǵyna nege biz jaýap berýimiz kerek. Ol basqa jaqtyń adamy. Árkimmen árjerde júrip júkti bolǵandardyń ólimine bizdi kinálaısyzdar. Bul máseleni mınıstrliktiń aldyna qoıý kerek, – dep qolyn sermep, minez kórsetti. Sózdi sońyna deıin tyńdaǵan Jaqsylyq Muqashuly memlekettik qyzmetkerdiń myna qylyǵyna ashýyn jasyra almady.

– Sizdiń adam taǵdyryna degen kózqarasyńyz durys emes. Onyń kimnen bala tapqanynda sharýańyz qansha? Ol onyń taǵdyry! Dúnıege urpaq ákelgisi keldi. Ósip-ónip, demografıaǵa atsalyspaqshy boldy. Qaıdan kelse de medısına kómek kórsetýi tıis. Ol bizdiń qandasymyz. Júkti áıelge memleketimizde barlyq jaǵdaı jasalady. Ekiqabat áıeldiń aǵzasynda aýyr syrqaty bar ekenin bilip turyp, nemquraıly qaraǵansyzdar. Kúshtep bolsa da emdelýine járdemdesýlerińiz kerek edi. Endi jaýapkershilikten qashyp, ýqıt-sýqıt dep qutylýdyń amalyn oılap otyrsyz, – dep kóptiń kókeıindegi oıyn dóp basty.

Sonda deımiz-aý, ana men balaǵa qamqor bolady degen bılik basyndaǵylardyń aıtyp turǵany mynaý?! Sózi men paıymdaýynyń ózi memlekettik qyzmetkerdiń ádebine jatpaıdy. Basqany bilmeımin, buqaralyq aqparat quraldarynyń ókilderi bir-birimizge qarasyp, myna sózge ishimizdiń qara qazandaı qaınaǵanyn baıqattyq. Qazaq atam ómirden ótkender jaıly ǵaıbat sóz aıtpaýshy edi. Myna kisiniki qaı sasqany?

Jıynda oblysqa dárigerler tartý, mekemeni basqara almaıtyn basshylardy aýystyrý, memlekettik jáne jekemenshik áriptestikti nyǵaıtý, qaıyrymdylyq qorlarymen yntymaqtastyq ornatý, merekelerde bas dárigerlerdiń emdeý ornynda bolýy jaıly sóz boldy. Biraq, kókeıde keptelip turyp alǵany Jambyl aýdany ákiminiń orynbasary Dastan Turarbekulynyń analar jaıly aıtqan aýyr sózi edi.

«Jetisý» gazeti