M.Áýezov atyndaǵy Qazaq memlekettik akademıalyq drama teatrynyń aktrısasy Naz Qurmanǵazyqyzy Jekenova 39 jasyna qaraǵan shaǵynda aýyr naýqastan dúnıe saldy. Bul týraly teatrdyń baspasóz qyzmeti habarlady.
Naz Qurmanǵazyqyzy Jekenova 1979 jyly Almaty oblysy, Raıymbek aýdany, Qarasaz aýylynda dúnıege kelgen. Qarasaz orta mektebin jáne M.Maqataev atyndaǵy óner mektebin bitirgen.
1994-1998jyldary Esik pedagogıkalyq kolejiniń «Mýzykalyq bilim» bóliminde bilim alǵan.
1998 jyly T.Júrgenov atyndaǵy Qazaq Ulttyq óner akademıasynyń «Teatr óneri» fakúltetine oqýǵa túsip, 2002 jyly atalmysh akademıany «Mýzykalyq teatr artısi» mamandyǵy boıynsha úzdik támamdaǵan.
2002 jyly M.Áýezov atyndaǵy Qazaq memlekettik akademıalyq drama teatrynyń akterlik quramyna qabyldanǵan aktrısa, qysqa ǵumyrynda kóptegen beınelerdi somdap, kórermen júreginen oryn aldy.
Atap aıtsaq, M. Áýezovtiń «Aıman-SHolpanynda» Aıman, «Abaıynda» Qarlyǵash, Ǵ.Músirepovtiń «Mahabbat dastany» tragedıasynda Tańsyq, Ý.Shekspırdiń «Gamlet» tragedıasynda Ofelıa, M.Kárimniń «Aı tutylǵan tún» tragedıasynda Shafaq, M.Baıdjıevtiń «Qylmysynda» Marıam, E.Ýahıtovtyń «Qudalarynda» Shapaǵat, T.Ýılámstyń «Shyny haıýanatynda» Laýra, D. Isabekovtiń «Ápkesinde» Gaýhar, Kámıla, M. Maqataevtyń «Qosh, mahabbatynda» Baný, I.Ǵaıyptyń «Qorqyttyń kórinde» Neke, «Men keleminde» Aqmunar, «Men ishpegen ý bar ma?..» rekvıeminde kishi kempir, R.Muqanovanyń «Máńgilik bala-beınesinde» Balerına, T.Nurmaǵanbetovtiń «Eski úımen qoshtasýynda» Aıjan, T.Nurmaǵambetovtiń «Qojanasyr tiri ekeninde» Áıel, «Bes boıdaqqa bir toı» komedıasynda Kúıketaı, B.Jákıev pen Á.Syǵaıdyń «Júreıik júrek aýyrtpaıynda» Nemere, E.Jýasbektiń «Kúlemiz be, jylaımyz ba?» komedıasynda Aıka, S.Asylbekulynyń «Imperıadaǵy keshinde», Iran-Ǵaıyptyń Á.Rahımovtiń «Shákáriminde» Qyz, N.Orazalınniń «Shyraq janǵan túninde» Sántaı , F.Dúmanýar men A.D.Ennerıdiń «Don Sezar de Bazanda» Markıza de Montefıore, I.Vovnánkonyń «Qaza men jazasynda» Madonna, R.Beleskııdiń «Jelikken jastarynda» Elmıra, A.Volodınniń «Qoshtasqym kelmeıdi» dramasynda Larısanyń anasy sekildi bir-birine uqsamaıtyn sahnalyq beıneler.
Qamshynyń sabyndaı qysqa ǵumyrynda akterlik talantyn tanytyp, kóptegen shyǵarmashylyq jetistikterge jetip, qazaq teatr ónerine óz úlesin qosty. Teatrdyń dástúrli «Teatr kóktemi-2004» festıvalinde – M. Áýezovtiń «Aıman-SHolpan» komedıasyndaǵy Aıman roli úshin «Úzdik debút» 2008 jyly M.Kárimniń «Aı tutylǵan tún» tragedıasynda Shafah roli úshin «Ekinshi plandaǵy eń úzdik áıel beınesi», «Teatr kóktemi-2015» festıvalinde T.Ýılámstiń «Shyny haıýanat» dramasyndaǵy Laýra roli úshin «Este qalar keıipker» júldesi, «Teatr kóktemi-2016» festıvalinde A.Volodınniń «Qoshtasqym kelmeıdi» dramasyndaǵy Larısanyń anasy roli úshin «Úzdik epızodtaǵy áıel beınesi» júldesine ıe boldy.
Talantty aktrısa Naz Jekenovanyń ákesi Qurmanǵazy aǵamyzǵa, týma-týysqandary, áriptesteri men dostaryna M.Áýezov atyndaǵy Qazaq memlekettik akademıalyq teatr ujymynyń atynan qaıǵyryp kóńil aıtamyz. Naz Jekenovanyń adamı bolmysy, sahnada somdaǵan beıneler kórermen jadynda saqtalady.
Marqummen qoshtasý rásimi 27 sáýir kúni saǵat 10.00-de M.Áýezov atyndaǵy Qazaq Memlekettik akademıalyq drama teatrynyń kishi zalynda ótedi.
