Aqtóbedegi kóliktegi atys pen júk kóligi júrgizýshisiniń ólimi arasyndaǵy baılanys tekserilip jatyr. Bul týraly Aqtóbe oblysy İİD qylmystyq polısıa basqarmasynyń bastyǵy Arman Muhamedıarov habarlady.
«Áleýmettik jelide oblys trassasynda banda paıda boldy degen aqparat tarady. Biraq olaı emes. Tergeý jumystary bastaldy, 6 jáne 19 sáýirde bolǵan jaǵdaılardyń baılanysy tekserilip jatyr», - dedi İİD ókili.
Arman Muhamedıarovtyń aıtýynsha, búgin oblys joldaryndaǵy patrúldeý kúsheıtilgen, ári jaǵdaı quqyq qorǵaý organdarynyń qatań baqylaýyna alyndy.
Eske sala keteıik, alǵashqy oqıǵa 6 sáýirde bolǵan. Qarýly belgisiz bir top Aqtóbe qalasy soltústik aınalma tas jolyndaǵy Aqshat aýyly mańynda Mersedes Benz mıkroavtobýsyndaǵy jolaýshylarǵa tap berip, aqsha men altyn buıymdar alyp ketedi. Atys barysynda 35 jastaǵy reseılik azamat zardap shekken.
Al 19 sáýirde Aqtóbe-Orynbor tas jolynda KamAZ kóliginiń júrgizýshisin atyp ketedi. Er adamnyń óli denesi tas joldan 35 shaqyrym qashyqtyqta tabylǵan.
