Aqtóbelik polıseıler Aqtóbe-Orynbor trassasynda bolǵan qylmysty kórgenderdi ún qatýǵa shaqyrady, dep habarlaıdy Qamshy.kz aqparat agenttigi.
Bul týraly Aqtóbe oblysynyń Óńirlik komýnıkasıalar qyzmetindegi baspasóz konferensıasynda Aqtóbe oblysynyń İshki ister departamentiniń krımınaldy polısıa basqarmasynyń bastyǵy Arman Muhamedıarov málimdedi.
Qazir quqyq qorǵaý organdarynyń qyzmetkerleri 19 sáýirde túnde Aqtóbe-Orynbor trassasy boıymen Reseı Federasıasy shekarasynan Qazaqstanǵa ótkenderdiń tizimin anyqtaýda. Olar aýyr qylmys kýágerleri bolýy múmkin.
«Bul qylmys kisi kóp júretin Aqtóbe-Orynbor trassasyndaǵy 35-shi shaqrymda bolǵandyqtan azamattardy kómek kórsetýge shaqyramyz. Ol jerdegi júk aǵyny óte joǵary. Qazirde biz sol ýaqytta qansha adam júrgenin, kim shekarany kesip ótkenin tekserýdemiz. Olardyń arasynda Qazaqstannyń, Tájikstannyń, Ózbekstannyń jáne Reseı Federasıasynyń azamattary bar. Ne de bolmasyn birdemeni ańǵarǵan, kórgen adamdardy izdestirýdemiz. Keıbireýleriniń mashınalarynda beınetirkegishter bolady. Eger múmkindikteri bolsa nemese birdemeni biletin bolsa, bizge habarlasýlaryn suraımyz, qupıalylyqqa kepildik beremiz», - dedi Aqtóbe oblysynyń İshki ister departamentiniń krımınaldy polısıa basqarmasynyń bastyǵy Arman Muhamedıarov.
19 sáýirde, shamamen túngi ekiler shamasynda Aqtóbe-Orynbor trassasy boıyndaǵy 35-shi shaqyrymda «Kamaz» avtomashınasy (beton aralastyrǵysh) tabylǵanyn, onyń salonynda júrgizýshi, Aqtóbe qalasynyń 1966 jylǵy turǵynynyń basyna tıgen oqtan qaıtys bolǵan óligi tabylǵany buryn habarlanǵan bolatyn. Osy derek boıynsha QR QK 2 taraýy, 99 baby boıynsha (Adam óltirý), sondaı-aq, qaraqshylyq shabýyl baby boıynsha sotqa deıingi tergeý júrgizilýde. Birqatar saraptamalar taǵaıyndaldy. Asa tájirıbeli qyzmetkerlerden jedel tergeý toby quryldy.
Tergeýdi Aqtóbe oblysynyń İİD jáne prokýratýra baqylaýǵa aldy.
«Osy qylmys týraly aqparattary bar áleýmettik jelilerde taralǵan daýyspen habarlaý shyndyqqa janaspaıdy. Sonda da barlyq nusqalar tekserilýde. Reıdtik is-sharalar, tekserister júrgizilýde. Jergilikti polısıa qyzmetiniń qyzmetkerleri qarý ıelerin turǵylyqty jeri boıynsha tekserýde. Biz sońǵy bes jyl ishinde joǵalǵan nemese urlanǵan qarýmen baılanysy bar-joǵyn da qarastyrýdamyz. Ótken jáne osy jyly bosap shyqqan, buryn sottalǵan adamdardy da tekserýdemiz. Bul qylmysty ashý maqsatynda osy baǵytta óte úlken jumys júrgizilýde», - dedi A.Muhamedıarov.
