Búgin Balýan Sholaq atyndaǵy sport saraıynda hokeıden áıelder arasyndaǵy Qazaqstan birinshiliginiń úshinshi týrynyń alǵashqy kezdesýleri ótti.

Birinshi bolyp jarys jolyna «Tomırıs» pen «Gornák» shyqty. Bul kezdesýde astanalyq qyzdar Rýdnyı hokeıshilerin 19:0 esebimen oısyrata utty.

Sonymen qatar, ekinshi oıynda «Aısulý U-18» men «Torpedo komandalary arasynda ótti. Alǵashqy eki kezeń birdeı upaı sandarymen aıaqtaldy. Birinshisinde 1:1, al ekinshisinde sáıkesinshe 2:2. Biraq, úshinshi kezeńde óskemendik "Torpedo" alań qojaıyndarynyń qaqpasyna eki shaıba salyp, 4:3 esebimen jeńiske jetti.

- Sheshýshi úshinshi týrda 5 komanda jarys jolyna shyǵady. Olar aınalyma júıesi boıynsha ózara myqtyny anyqtaıdy. Osy týrda «Aısulý U-18» alǵa umtylý úshin jaqsy nátıjeler kórsetýi qajet. Biraq, olar tek tórtinshi oryndy ǵana ıelene alady. Júldeli oryndardy sarapqa salý úshin áli de biraz jumys isteý qajet. Al «Aısulý» turaqty túrde birinshi orynda, oǵan qosa, olardyń basty qarsylastary astanalyq hokeıshi qyzdar qatelikter jiberip, upaılaryn joǵaltqan bolatyn. Osy jyly da «Aısulý» Qazaqstan chempıony atanady dep oılaımyn, - dep qorytyndylady jarystyń bas tóreshisi Sergeı Petrechenko.

Eske sala ketsek, almatylyq «Aısulý» men «Aısulý-18» komandalary qonaqtardy kúndelikti saǵat 10:00-de jáne 12:40-ta qabyldaıtyn bolady. Oıyndar sport saraıynyń kishi zalynda ótedi. Aıta keter jaıt, el chempıonatynda almatylyq «Aısulý» birinshi orynmen kósh bastap tur.

21 sáýir

10:00. «Aısulý» - «Aısulý-18»

12:40. «Torpedo» - «Gornák»

22 sáýir

10:00. «Aısulý» - «Tomırıs»

12:40. «Aısulý-18» - «Gornák»

23 sáýir

10:00. «Aısulý» - «Torpedo»

12:40. «Aısulý-18» - «Tomırıs»

24 sáýir

10:00. «Tomırıs» - «Torpedo»

12:40. «Aısulý» - «Gornák»