Búgin Almatyda Ulybrıtanıanyń gendik aýrýlardy emdeý boıynsha tájirıbeli mamandary aımaqtardan kelgen 100-den astam dárigerge semınar ótkizýde. Shara «Balalardaǵy mýkovısıdozdy dıagnostıkalaý men emdeýdiń ózekti máseleleri» atty ǵylymı-tájirıbelik konferensıa aıasynda uıymdastyrylǵan.
QR DSM Pedıatrıa jáne balalar hırýrgıasy ǵylymı ortalyǵy baspasóz qyzmeti keltirgen derek boıynsha, búginde Qazaqstanda resmı túrde mýkovısıdozǵa shaldyqqan 105 naýqas tirkelgen.
«Ár bala sapaly em alyp, uzaq ómir súrýge quqyly. Sharany ótkizýdegi basty maqsatymyz QR dárigerleriniń biliktiligin arttyryp, osy dertke medısınalyq qoǵamdastyqtyń nazaryn aýdartý», - deıdi «Mýkovısıdozben aýyratyn múgedek balalar» QB basshysy Indıra İzbasarova.
Onyń aıtýynsha, gendik aýrýǵa shaldyqqan naýqastardy emdeý búkil álemde erekshe qymbat jáne álemniń barlyq damyǵan elderinde arnaıy Memlekettik baǵdarlamalarmen qamtamasyz etiledi.
Eki kúndik semınardy júrgizýge Greıt Ormond-strıt jáne Brompton Koróldyq aýrýhanalarynyń jetekshi dárigerleri Ien Balfýr-Lın, Ammanı Prasad, Súzan Medj, Mılan Masek, Súzı Kennı jáne Dúnıejúzilik mýkovısıdoz uıymynyń Prezıdenti Terrı Stúart myrzanyń ózi keldi. Shetel mamandary naýqas balalardy durys kútý men tamaqtandyrý boıynsha keńester beredi.
Biliktilikti arttyrý maqsatynda ótip jatqan semınarǵa pedıatrıalyq qyzmettiń 100-den astam dárigerleri: pýlmonologtar, dıetologtar, gastroenterologtar, sonymen qatar, Qazaqstan respýblıkasynyń barlyq aımaqtarynan sırek (orfandyq) aýrýlar boıynsha óńirlik úılestirýshiler men medısınalyq JOO stýdentteri qatysýda.
Aıta keteıik, atalmysh shara aıasynda 26 sáýir kúni sheteldik qonaqtar QR DSM Pedıatrıa jáne balalar hırýrgıasy ǵylymı ortalyǵynyń tynys-tirshiligimen tanysyp, sırek aýrýlarǵa shaldyqqan balalardyń ata-analarymen kezdesedi. Kezdesý aıasynda №2 qalalyq balalar emhanasy, QR Densaýlyq saqtaý mınıstrligi ókilderi jáne klınıka dárigerleriniń qatysýymen dóńgelek ústel otyrysy ótedi. Onda balalardaǵy mýkovısıdozdy dıagnostıkalaý men emdeý, aýrýdy dıagnostıkalaýdyń medısınalyq-genetıkalyq máseleleri, emdeý jáne dárilik zattarmen qamtamasyz etý, kınezıterapıa jáne naýqasty ońaltý máseleleri talqylanyp, oqytý dárisi boıynsha qorytyndy shyǵarylady.
Sondaı-aq, Qazaqstanda mýkovısıdoz ortalyǵyn salý jaıyn talqylaý josparlanǵan.
Joldas Órisbaev
