Kóktem kelse kórikti qyzdaı qulpyryp sala beretin Almatynyń ár buryshynda, mine, bir aı boıy áz-Naýryz toılanyp jatyr. Ásirese, bilim shańyraqtary men mektepke deıingi mekemelerdegi ótip jatqan merekeler tipti erekshe mazmunda. Sondaı bir tamasha mereke Áýezov aýdanyndaǵy №97 jalpy bilim beretin mektep aýlasynda ótti. Bir shańyraq astynda birneshe ult balalary tatý-tátti ómir súrip, bilim alyp jatyr. Sondyqtan olardyń negizgi taqyryby áz-Naýryz ben uly dostyqqa arnaldy.
Keń aýla alyp kıiz úı ispetti bezendirilgen. Altybaqanǵa terbelgen oqýshylardyń júzi tipti shat. Ásem áýen tek mektep aýlasyn ǵana kernegen joq, kórshi úılerdiń turǵyndary da merekeni syrttaı qyzyqtap qarap turdy. Sonymen, jańarý men jasampazdyqtyń bastaýy, dostyq pen yntymaqtyń, dáýletti tirshilik ataýlynyń bulaq kózi bolǵan áz-Naýryz toıy bastalyp, kóktemniń kelgenin «súıinshilep» bildirgen, teatrlandyrylǵan kórinis kórsetildi. Barsha mereke qonaqtary men mektep ujymyn osynaý bilim shańyraǵynyń basshysy Zoıa Qoıshybaeva quttyqtady.
– Qazaq halqy erteden-aq Naýryz keldi, qut kirdi, yrys keldi» dep kóktemniń kelgenine qýanyp, birliktiń, berekeniń kezeńi bastaldy dep aıryqsha qurmettegen. Shynymen de kúnniń kóziniń jylýy barshamyzǵa kóterińki kóńil-kúı ǵana syılap qoıǵan joq, bilimge, eńbekke degen yntamyzdy da arttyra túskendeı. Búgingi mereke ústinde jaqynda ǵana «Altyn qoldar» dep atalatyn halyqaralyq sándik qoldanbaly baıqaýǵa qatysyp, birinshi dárejeli júldeni jeńip alǵan 11-synyp oqýshysy Nıkıta Malofeevke arnaıy dıplomdy tabys etkeli turmyn. Bizdiń mektep búgin osyndaı qos qýanyshty toılap otyr, – degen Zoıa Qashqynbaıqyzy jeńimpazben birge onyń jetekshisi O.Tımoshenkony da quttyqtady.
Mekteptiń hor ujymy «Ǵajaıyp álem» ánin oryndasa, 11-synyp oqýshylary «Naýryz» atty fleshmob bıdi bıledi. Mekteptiń 5-synybynda oqıtyn kishkentaı bıshiler «Kalınka» bıin, 6 «a» synyp oqýshysy Ekaterına Fokına «Horezm» bıin, «Edelveıs» bı toby «Pavlınder» bıin, Anastasıa Semenova «Men qazaqtyń qyzymyn» ánin, 5 «a» synyp oqýshysy Anastasıa Machneva izgi tilegimen, 7-synyp oqýshylary ádemi bıimen, 9-synyp oqýshylary «Súgir» bıin bılep, merekeniń kórkin kirgizdi. İzgilikke toly mereke óte kóńildi ári mazmundy bolyp ótti. Ulttyq oıyndarǵa da kezek berildi. Ásirese, 9–11-synyp oqýshylarynyń «Kim jyldam jeıdi?» jarysy óte qyzyqty ári tartymdylyǵymen este qaldy. Mekteptiń deneshynyqtyrý páni birlestiginiń uıymdastyrýymen oqýshylar arasynda qazaqsha kúres, toǵyzqumalaq, báıge, tymaq urý sıaqty ulttyq oıyndardyń jarysy da áz-Naýryzdyń qyzyqty ótýine ıgi áser etti. Mektep oqýshylarynyń merekesine arnaıy kelip qatysyp otyrǵan ata-analardyń aq tilegin qadirmendi qarıa, asyl áje bata berip jetkizdi. Ulttyq kıim kıgen arý qyzdar shashý shashyp, kelgen jyldy qarsy alýdyń yrymyn jasady.
Raıa Eskendir
Almaty Aqshamy
