- Qas qaraısa, shyqpańdar dep dalaǵa!
Aqyl qosyp otyratyn araǵa.
Áli esimde buryn ájem aıtatyn,
Sol aqylyn úıde otyrǵan balaǵa.

Borandy kún ıt pen bala qutyryp,
Aqylynan ketetinbiz qutylyp.
Sodan keıin jerden taıaq jeımiz kep,
Úıge qaraı al qaıtamyz utylyp.

Ájem aıtqan aqyl sonda basqa eken,
Bizdiń kóńil sol aqylǵa qas pa eken?!
Shyqpa dese, syry onyń tasta eken,
Tasta da emes, eseıetin jasta eken.

Qas qaraısa, qazir meniń qasymda,
Myń qubylǵan oılar jatyr basymda.
Túnek bassa túneretin dúnıe,
Jumbaq ári qorqynyshty rasynda!

Bozbala shaq,
Eseıdik pe bilmedim,
Túsingendeı dúnıeniń bir kemin...
Qas qaraısa kúbir-kúbir bireýler,
Daýystaıdy, men daýyspen birgemin.

Qulaǵymnyń túbine kep sybyrlap,
Án salady báz bireýler yńyldap.
Bala kúngi essiz kóńil dál búgin,
Úreı basqan dúnıege qubylmaq.

Qas qaraısa dala túgil úı ishi,
Ólikterdiń... shynymen-aq ıisi.
Qulaǵyma jyrtyńdaǵan estiled,
Qos shaıtannyń, qos ibilis súıisi...

Kúbirleıtin kimder sonda qulaqqa,
Ketpeı qoıdy nege daýys jyraqqa???
Túnnen shyqqan del-sal meniń túrimdi,
Baıqamaıdy basqa adamdar biraqta.

Dertim be eken, aýrymyn ba álde men,
Aıta almaımyn al dertimdi elge men.
Bala kúnde kórshi bala dalaǵa,
Shyǵyp ketip adasqanyn kórgen em...

Men de sonda dala bezip júrgen em,
Taý-tasym bar jerim de joq júrmegen.
Qas qaraıyp, kirpik ketken ilinip,
Aı dalada túnep shyqtym, bilmegem.

Sodan beri estip kelem daýysty,
Daýys kúnde, daýystarmen qaýyshty.
Oılanýǵa álim kelmeı otyrmyn,
Ózimdi-ózim álde meni taýysty...

Tún batady sodan tańdy atyram,
Oıdy oıǵa tereńinen batyram.
Qas qaraısa janarymdy tars jumyp,
Daýystardan óleń qurap otyram...

(s) Marǵulan Aqan