Facebook jelisinde Evgenıı Vojjov degen atpen tirkelgen qoldanýshy qazaqtarǵa til tıgizdi. Qazaq áıelderin maımylǵa teńegen ony Kaıra Baıgereev degen bireý qoldaı ketken, dep jazady Qamshy.kz aqparat agenttigi. 

Myna skrınshottar kesheden beri áleýmettik jelide tarap jatyr. Vojjovtyń Facebook-tegi paraqshasynda Astana qalasy advokattar alqasynda jumys isteıdi dep kórsetilgen. Alaıda qazir onyń akkaýnty óshirilgen.

Daýdyń basy Jeńis kúnine arnalǵan lentadan shyqqanǵa uqsaıdy. 2015 jyly QR Mádenıet jáne sport mınıstrligi "Jeńis lentasynyń" jańa úlgisin jasap, qoldanysqa engizgen. Alaıda Evgenıı Vojjov pen Qaırat Baıgereev syndy birqatar azamattar buǵan qatty narazy. Mysaly, Qaırat Baıgereev óziniń Facebook-tegi paraqshasynda osyǵan baılanysty vıdeo jarıalady. 

Onyń oıynsha, kók tústi lenta el arasyna jik salady. "Bılik engizgen kók tústi lentanyń Jeńis kúnine qatysy joq", — deıdi Baıgereev. Basty sýretine Sovet odaǵynyń týyn qoıǵan Qazaqstan azamaty áli  kúnge deıin bodandyqty kókseıtindeı kórindi.

Jalpy ultaralyq arazdyqty qozdyratyn pikirler jelide ara-tura qylań berip qalady. Ótken aıda Adılám Ýshýrova atty qoldanýshy qazaqtardyń ar-namysyna tıip, "mambetter" dep kemsitken edi. "Senderdi taýǵa qýyp jiberip, maldyń tezegin jegizý kerek" degen onyń sózine qarsy halyq óre túregeldi. Kóp uzamaı Adılám Ýshýrova vıdeoúndeý jasap, elge mán-jaıdy túsindirdi. Jylamsyrap otyryp, ol pikirdi ózi jazbaǵanyn, belgisiz bireý akkaýntyn buzyp kirgenin aıtyp aqtaldy.

Ańdamaı sóılegen sózdiń arty jaqsylyqqa aparmaýy múmkin. Elimizdegi beıbitshilik pen yntymaqtyń tunyǵyn shaıqaıtyn arandatýshylardy zań boıynsha jazalaǵan durys. El ıesi, jer ıesi qazaq halqyn qorlaýǵa eshkimniń quqyǵy joq. Quzyrly oryndardan Evgenı Vojjovtyń isin teskerýdi TALAP ETEMİZ!