QR bala quqyqtary jónindegi ýákili Zaǵıpa Balıeva 12 jasqa deıingi balalardy qaraýsyz qaldyratyn ata-ana alardy jazalaý týraly usynysyna túsinikteme berdi, dep habarlaıdy Qamshy.kz aqparat agenttigi.
"Jeli qoldanýshylary ata-analardyń jaýapkershiligi týraly aıtqan sózimdi qyzý talqylap jatqan kórinedi. Bul máseleniń aınalasyndaǵy saýaldarǵa menen artyq eshkim jaýap bere almaıdy dep oılaımyn. Eseptik kezdesýde ata-analardyń jaýapkershiligin bala qaýipsizdigin qamtamasyz etetin negizgi qural dep ataǵan bolatynmyn. Meniń tarapymnan bul tarmaqqa basa nazar aýdaryldy. Ata-analardyń bala ólimi men jaraqattanýdy aldyn-alatyn negizgi sharalardy turaqty qoldanatyny belgili", - dep jazady Balıeva facebook paraqshasynda.
Balıeva sońǵy jyldardaǵy bala ólimine qatysty statısıka qorqynyshty ekenin aıtady. Al sebepteri odan da aýyr. Árbir úshinshi oqys jaǵdaı ata-analardyń salaqtyǵynan bolǵan. Onyń oıynsha bul máselege beı-jaı qaraýǵa bolmaıdy.
Bul rette Balıeva ata-analardyń jaǵdaıyna yńǵaıly sharalar qoldanylady deıdi. Eger balanyń anasy otbasyndaǵy jalǵyz asyraýshy bolsa, 50 myń jalaqyǵa bir jerde satýshy bolyp jumys isteıtin bolsa, bala kútýshisin jaldaý qıynǵa soǵady. Osy sebepti biz ata-analar úshin balalarynyń bala-baqshasyna jaqyn jerden jumys taýyp berý jaǵdaıyn qarastyryp jatyrmyz.
"Bizder qarama-qaıshy jaǵdaılar da kezdesedi. Mysaly ata-anasy balasyn uıyqtatyp, esikti kilttep, qonaqqa ketip qalady. Qaraýsyz qalǵan bala ol ýaqytta oıanyp oqys jaǵdaıdan kóz jumady nemese jaraqat alady. 111 nómirine osyǵan uqsas jaǵdaımen bir kúnde qanshama adam kómek surap habarlasatynyn bilseńizder, shoshıtyn edińizder", - dedi bala quqyqtaryn qorǵaý jónindegi ýákil.
"Eki jaǵdaıdyń arasy jer men kókteı ekenin atap ótkim keledi. Birinshi jaǵdaıda bizge oılaný kerek. Qıyn jaǵdaıǵa qaramastan balalaryn asyrap otyrǵan batyr analarǵa arnalǵan naqty usynystar kútemin. Ekinshi jaǵdaıda memleket balanyń ólimine ákelip soqtyratyn jaýapsyzdyqqa beı-jaı qaramaı, jaza túrin aýyrlatý kerek. Balanyń oıynshyq, mashına, nemese jeke zat emes ekenin túsinýimiz kerek. Bala - ómir súrýge quqyǵy bar tulǵa", - dedi Balıeva.
Balalar ombýdsmeni elimizde Germanıa tájirıbesindegi balany qaraýsyz qaldyrǵandarǵa zań júzinde qoldanylatyn tásil qaralyp jatqanyn aıtyp ótti.
"Bul zań kelesideı logıka boıynsha jasalyp jatyr: bala úıde jalǵyz qalǵanda terezeden qulaýy, úıde órt tutanýy múmkin, toqqa túsip nemese pyshaqpen jaralanýy múmkin. Bul jaǵdaılar elimizde qazirdiń ózinde jıi bolady. Álbette barlyǵy ata-analardyń jaýapsyzdyǵynan dep aıtý artyq. Kóbisi ómir súrý úshin, balalaryn asyraý úshin jumys isteýge májbúr.Qazirgi tańda bir ǵana fakt belgili: balalar jaraqat alyp jatyr jáne bolmashy jaǵdaıdyń kesirinen ajal qushýda. Máseleniń kúrmeýin úkimet pen balalar ombýdsmen ınstıtýti birigip sheshýi tıis. Atalǵan problemany sheshýge, naqty sharalar qoldanýǵa arnalǵan usynystaryńyz bolsa qýana qabyldaýǵa ázirmin" - dep qorytyndylady Balıeva.
Esterińizge salamyz, Zaǵıpa Balıeva osyǵan deıin 12 jasqa deıingi balalardy qaraýsyz qaldyrýǵa tyıym salýdy usynǵan bolatyn.
