«Nur Otan» partıasynyń hatshysy Tamara Dúısenova Qazaqstandaǵy menıngokok ınfeksıasyna baılanysty densaýlyq saqtaý mınıstrligin synǵa aldy dep habarlaıdy Qamshy.kz aqparat agenttigi.
Tamara Dúısenova bul týraly «Nur Otan» partıasynyń ortalyq apparatynyń otyrysynda baıandady. Jıyn barysynda partıa hatshysy densaýlyq mınıstrliginiń ókilderi men óńirdegi basqarmalardyń jumysyn nazarǵa aldy.
"Jıynǵa qatysyp otyrǵandardyń barlyǵy óz isiniń bilikti mamandary. Men barlyǵyńyzdy jaqsy bilemin. Birge jumys istedik. Úlken sharýalar atqardyq. Alaıda búgin kóńilderińizdi qaldyrýym múmkin. Sizder úlken problemaǵa tap boldyńyzdar jáne áli de bul máseleni sheshetin shamalaryńyz joq", - dedi Tamara Dúısenova.
"Birinshiden, sizder qadaǵalap otyrǵan mekemelerde tártiptiń joqtyǵy baıqalyp qaldy. Bul siz qadaǵalaıtyn uıymdarǵa qatysty, Alekseı Vladımırovıch", - dedi Tamara Dúısenova densaýlyq saqtaý vıse-mınıstri Alekseı Soıǵa.
Burynǵy densaýlyq saqtaý jáne halyqty áleýmettik qorǵaý mınıstriniń pikirinshe, (eskertý:keıinirek - halyqty áleýmettik qorǵaý mınıstri) juqpaly aýrýlarǵa baılanysty qyraǵylyq tómengi deńgeıde.
"Osy nárseler densaýlyq saqtaý júıesiniń jumysyna keri áserin tıgizedi. Men 24 saǵat medısınalyq kómek kórsetetin dárigerlerdiń qatarynda bilikti mamandar joq degen pikirden aýlaqpyn. Barlyǵyna jalpylama baǵa berý durys emes. Alaıda bizdegi jaǵdaı atalǵan eki problemanyń ýshyǵyp turǵanyn naqtylap berdi",- dedi Dúıenova.
"Menıngıt ınfeksıasynyń órshýi bıyl ǵana ýshyqqan problema emes. Bul jyl saıyn kóteriletin másele. Juqpaly aýrýdyń jańa túri paıda bolyp, kúresý joldary belgisiz bolsa túsiner edim. Másele bizdiń mundaı jaǵdaıda qalaı áreket etýdi bilmeıtindigimizde", - dedi partıa hatshysy.
Sonymen qatar, Tamara Dúıenova 2015 jyly menıngıt boıynsha 424 jaǵdaı tirkelgenin, alaıda adam óliminiń deńgeıi tómen bolǵanyn atap ótti.
