Búgingi kúni tárbıe jaıly sóz qozǵasaq ómirde oryn alyp jatqan oqıǵalardyń jaǵymsyzyn jınap alyp ata-ana nemese ustazdarǵa syn kózben qaraıtyn boldyq. Ǵalamtordan «Aq qaǵaz ben qara núkte» jaıly aqparatty oqyǵannan keıin jazbaly oıǵa shomdym. Rasymen de biz úlken aq paraqtan kishkentaı qara núkteni ǵana baıqaıdy ekenbiz. Shyndyǵynda shalys qadamdarǵa baryp júrgender jeterlik. Sony dabyra qylyp talqyǵa salý arqyly otqa maı quıyp, máseleni órshitip jatqanymyz ókinishti. Bálkim bul da durys bolar. Degenmen sol núkteniń kóleńkesindegi keremetti de kórgenimiz jón.
Otbasy – jylýynan janyń jaılanyp, myqty qorǵanynan ózińdi qaýipsiz sezinetin meken. Sebebi tirshiliktiń adamzatqa tán qarym-qatynas deıtin jurnaǵy bar. Otbasynyń shattyǵy da sol ara-qatynasty baǵalaýynda. Bala kúnimde anamdy tynymsyz suraqtarymmen mazalaıtynmyn. Bilgim keletini qaısymyzdy qattyraq jaqsy kóretini. Anashym bolsa múldem alalamaıtynyn túsindirýge tyrysatyn: «Sender meniń jumylǵan judyryǵym (judyryǵyn túıip) sekildisińder, árqaısyńnyń óz oryndaryń bar. Biriń aqylshym, ekinshiń erkem, úshinshiń qolǵabysym, qalǵandaryń qorǵanyshym. Sender bes saýsaqtaı birige alasyńdar, biraq bóline almaısyńdar. Óıtkeni boılaryńda ákeń ekeýmizden daryǵan adamgershilik qasıetteri bar. Sol senderdi tas qylyp biriktiredi» deıtin. Al ekeýińizdiń qaısylaryńyz kóbirek jaqsy kóresizder degen saýalǵa: «Men bastaryńnan sıpaǵanda meıirimdiligimdi, ákeleriń mańdaılaryńnan súıgende qamqorlyǵyn tanytqysy keledi. Sen de baýyrlaryńa baskóz bolý arqyly jaýapkershilikti sezinesiń. Sol sıaqty, kimniń qanshalyqty jaqsy kórýin bilý, ony artyq ne kem qylý burys is. Durysy mahabbatyńdy kórsete bilgenińde» degendi jıi qaıtalaıtyn. Senim bildirý, senimge ıe bolý, súıispenshilikke bólený, qýanysh syılaý, jaqsy kórý, ózgege alań bolý, qıyndyqty eńserý, jetistikke jetý, alǵa qadam basý taǵy adaldyq, syılastyq syndy sezimderdiń ne ekenin, sol shaqtarda bir-birimizdi tárbıeleý barysynda úırengenimdi jáne úırete bilgenimdi uǵyndym. Eń bastysy biz anamyz barda ashtyqty, ákemiz barda tońýdyń ne ekenin bilmeı óstik. Januıadaǵy kózge kórinbeıtin keremet – ol sheksiz mahabbat.
Maqalany jazarymda aıtarymdy jaqynynyń nuryna bólengender túsinip, al jetim kúıin keshkenderdiń kerisinshe qabyldap qalýy múmkin ekendigin oılandym. Bálkim men olardyń taǵdyryn syrttaı topshalap otyrǵan bolarmyn. Áıtse de, sol jandarǵa: «Qandaı sebeppen bolmasyn jalǵyz qalsańyz da ómir súrýińizdi toqtatpańyz. Baqytty bolǵyńyz kelse basqanyń baqytyn kóre, ómirdi kóleńkesimen súıe bilińiz degim keledi.
Aıaýjan Nurmolda
Halyqaralyq medıa
jýrnalısıka ortalyǵy
MediaNet bilimgeri
