AQSH prezıdenti Donald Tramp 6 maýsymda Aq úıde aýyzashar berdi.
Sheteldik BAQ deregine súıensek, shaqyrylǵan qonaqtar tiziminde ıslam memleketteri dıplomatıalyq mısıalarynyń basshylary boldy.
Budan bólek aýyzasharǵa Saýd Arabıasy, Iordanıa, Egıpet, Túrkıa, BAÁ, Týnıs, Irak, Katar, Bahreın, Marokko, Aljır, Lıvıa elshileri qatysty.
AQSH prezıdenti ıslam álemin qasıetti Ramazan aıymen quttyqtap, sóz sóıledi. Óz sózinde, Ramazan aıynyń ıslam dinindegi mańyzyn aıta otyryp, prezıdenttik laýazymyndaǵy alǵashqy sheteldik saparyn Saýd Arabıasyna jasaǵanyn esine túsirdi.
AQSH-ta prezıdentterdiń musylmandarǵa aýyzashar berý dástúri prezıdent Klınton kezinen bastalǵan. Alaıda, Tramp prezıdenttik merziminiń alǵashqy jylynda bul úrdisti úzip alyp, bıyl jalǵastyrdy.
