Oljas Súleımenovtyń qaıtys bolǵan nemeresi Eskendir Súleımenovtyń qalyńdyǵy Alýa Bekqoja Tengrinews.kz tilshisine suhbat berdi. Suhbaty barysynda Alýa Eskendirdiń motosıkl aıdaýyna túbegeıli qarsy bolǵanyn aıtady. Alaıda jigit motosıkl alýdy bala kezinen armandaǵan eken. Tipti ata-anasy da qarsy bolǵan kórinedi.

«Eskendir bir isti qolyna alsa, sońyna deıin jetkizbeı qoımaıdy. Motosıkl alýdy bala kezinen armandady. Almaýyn ótindim, tipti «ne meni, ne motosıkli tańdaýyn» talap ettim. Biraq munymnan túk shyqpady», - dep esine túsirdi Alýa.

Eskendir men Alýa birneshe ýaqyt jaqyn dostar bolyp aralasyp júrgen. Ýaqyt óte kele eki jas ekeýine ortaq erekshe sezimniń baryn baıqaıdy, olar bir-birine dostardan da jaqyn edi. Eki aı buryn jigit qyzǵa úılengisi keletinin aıtyp usynys jasaıdy, bir-biriniń ata-analarymen tanysady. Jaqyn ýaqytta dúrkiretip toı jasamaq nıette bolǵan eken. Alaıda taǵdyrdyń isine sharań bar ma?! Jastardyń máńgilik birge bolýyn jazbaǵan eken.

Alýa súıiktisiniń adamgershilik qasıetteri jaıly syr shertti.

«Eskendir aq jarqyn jigit edi. Ózgelerden ony erekshelep turatyn kórkem minezi boldy. Meıirimdi edi, adamdardyń tek jaqsy jaqtaryn kóretin», - dedi qyz.

Al Eskendirdiń qazasy jaıly habardy Alýa jumysta bolǵanda estigen. Ómirin arnamaq bolǵan súıiktisiniń endigi joq ekenine qyz áli senbeıdi. Jol apaty bolar kún buryn ekeýi jeli arqyly sóılesken eken. Alaıda Eskendir Alýanyń sońǵy jazǵan hatyn sol kúıi oqymady. 

Aıta keteıik, Eskendir Súleımenov  22 maýsymda Astanadaǵy Máńgilik el – Kereı-Jánibek kósheleriniń qıylysynda jol apatynan qaıtys boldy. Ony týystary Almaty qalasynda jerledi.