Qazaqstannyń Fransıadaǵy Elshiliginde Memleket basshysy Nursultan Nazarbaev bekitken Ulttyq dombyra kúnine oraı saltanatty shara ótti. Bul týraly Qamshy.kz aqparat agenttigi QR SİM baspasóz qyzmetine silteme jasap habarlady.

Shara barysynda, dıaspora ókilderi men fransýz azamattary asyrap alǵan qazaq balalary, «Qorqyt» mádenı ortalyǵynyń jetkinshekteri, Elshilik qyzmetkerleri men olardyń otbasylary birlese merekelik konserttik baǵdarlama usyndy. Dombyrada uly sazgerlerdiń kúıleri men tanymal halyq ánderi oryndaldy. Sondaı-aq, kórermender qobyz, jetigen jáne basqa da mýzykalyq aspaptardaǵy shyǵarmalar tyńdady.

Qazaqstannyń Fransıadaǵy Elshisi Jan Ǵalıev sharanyń ashylýyndaǵy sózinde jınalǵan qaýymdy quttyqtap, Elbasynyń bul merekeni elimizdiń ulttyq mádenıet pen biregeılikti saqtaý jáne qaıta jańǵyrtý maqsatynda bekitkenin jetkizdi. Ol, sondaı-aq, 2014 jyly dástúrli qazaq dombyrasyndaǵy kúı oryndaý óneri IýNESKO-nyń adamzattyń materıaldyq emes mádenı murasy tizimine engizilgenin atap ótti.

Sonymen qatar, J. Ǵalıev Fransıadaǵy qazaq mádenıetin nasıhattaý boıynsha belsendi jumysy úshin «Qorqyt» ortalyǵyna alǵysyn bildirdi. Elshiniń aıtýynsha, otandyq dıplomattar shetelde elimizdiń baı ulttyq mádenıetin ilgeriletý jolynda únemi jumys atqaryp keledi jáne osyǵan baılanysty Ulttyq dombyra kúni merekesiniń bıyl jyl saıyn 2 shildede atap ótiletin Qazaqstan Respýblıkasynyń dıplomatıalyq qyzmet kúni qarsańynda ótkizilýinde bir mán baryn atap ótti.

Elshilikte bas qosqandar dombyrany halqymyzdyń baı mádenı murasynyń negizgi sımvoldarynyń biri ekendigin atap ótti jáne jańa mereke barlyq qazaqstandyqtardyń ulttyq biregeıligi men birligin nyǵaıtýǵa yqpal etetin jaqsy dástúrdi qalyptastyratynyna senim bildirdi.