Shymkentte 11 jasar bala zorlandy degendi alǵash estigende jaǵamdy ustadym. Bir aı boıy sol balanyń basynan keshkeni kók jáshiktiń «sánine» aınaldy. Áleýmettik jeli shýlady, jýrnalıser aqparatyn jaýdyrdy, áıteýir bala umytyldy. Mundaı sumdyq endigári qaıtalanbasa eken dep ishteı tiledik. Biraq qudaı tilegenimizdi bermedi. Shyraıly Shymkent jaqsy jańalyqtarmen qýantpaı, qaıtadan kóńilge kirbiń túsirdi. Taǵy bir bala pedofıldiń oıynshyǵyna aınaldy. Ata-ana retinde balamyzdyń bolashaǵyna alańdap, aýladaǵy átkenshekti tebýge jalǵyz jiberýge qorqyp otyrmyz. Bılik bolsa jumǵan aýzyn ashpaıdy. Qazaq sheneýnikteriniń balalary bar ma, olar bolashaq úshin ýaıym shegedi me, teledıdardy qosyp elde ne bolyp jatyr eken dep qyzyǵýshylyq bildiredi me degen mazaly suraq týyndaıdy. Qurysyn bári, feısbýkqa kiredi me eken? Álde Sýkerbergten seskenip, tek ınstagramdy panalaıdy ma?
Feısbýk demekshi, atalmysh sumdyq oqıǵaǵa baılanysty azamattyq pikirin bildirip, pedofılderge qatysty qoldanylatyn jazany qataıtý máselesin kóterip, bılikten bas kóterip, qulaq asýdy surap jatqan qazaqtyń qarasy kóp. Nazarlaryńyzǵa usynaıyn.
Ańsaǵan Mustafa: «Baıaǵyda Amerıkada bir pedofıl balasyn qorada zorlap jatqan jerde ákesi ústinen túsip, tóbeles bolyp, mılısıa ustap áketipti, biraq ákesi kesh barǵan eken, bala alǵan travmalardan kóz jumypty. Ol kezde Amerıkada ólim jazasyn bermeıtinin bilgen áke, sot júrip jatqan úsh aıda drotıkpen meshenge týra qadap úırenýmen ýaqytyn ótkizipti. Sot otyrysy bolǵan kúni qaltasyna drotık salyp aparyp, sot sheshimin shyǵara bergende, drotıgin laqtyryp haıýannyń mańdaıynan saq etkizip dál tıgizip, búkil sottardyń kózinshe o dúnıege attandyryp jibergen eken. Sot azdap keńesip, balanyń ákesin, sot zalynan shyǵaryp jibergen eken... Bizdiń elde ólim jazasy joq, eń bolmasa, pishtireıik maldardy. Keshe Shymkentte bolǵan oqıǵany bárimiz kórdik, masqara ǵoı. Ol otyryp shyǵyp, basqa balaǵa taǵy qıanat jasaýy múmkin... Pedofıldardyń butynan burǵy tyǵyp basynan tesip shyǵaryp óltirý kerek. Eldiń kózinshe. Talap etem. Qashanǵy beıkúná perishteler zorlana berý kerek? Nege?»
Elmıra Ábdikárimova:Bizdiń erler jaltaq pa, qorqaq pa bolyp qalǵan sıaqty... Jaı kúnde kúshterin qaıda jumsaryn bilmeı, tasynyp atyp ketip, pyshaqtap óltire salady, jazyqsyzdar da bar ishinde... Osyndaı jaǵdaıda kórsetińdershi sol kúshterińdi, qurmetti azamattar! Mundaı malǵundarǵa jany ashýdyń ózi artyq! Bárimiz ul-qyz ósirip otyrmyz, qashanǵy úreı-qorqynyshpen ómir súremiz?! Zańǵa nege engizbeıdi ólim jazasyn? Bular dandaısydy, sany artyp barady, tipti oqyp turyp eleń etpeı ótip ketetinder kóbeıdi. “Eti ólip ketken"...Adamnyń eń osal tusy, álsiz jandy jeri de perzenti, bala úshin otqa da kúıip, sýǵa da túsemiz... Bul tipti eń qorqynyshty jaǵdaı! Halyqtyń aldyna shyǵartyp tas laqtyryp, azaptap óltirsin!
Aıatjan Ahmetjan: Pedofılderge - ólim!
Bul talqylanbaýy kerek!
Názıa Joıamergenqyzy: Pedofılderge ólim jazasy kesilsin! Qansha bala, qansha áke men ananyń kóz jasyna qalatyndardyń ómir súrýge qaqy joq! Olar emdelmeıdi! Pishtirýdiń de qajeti joq. Onda aıýandardy túrmede tegin asyraý – aqymaqtyq!
Serikqazy Kókenaı: Myna maldy tipti sottalsa da, túrmege tiri qoıa beremiz be? Ony atý, asý az! Pyshaqtap, keskilep janyn qınap óltirý kerek! O, Qudaıym óziń keshire kór! Osylaı qoǵamda talqylaý jasap, ary qaraı joǵary bılikke, quqyq qorǵaý organdaryna jáne zań shyǵarýshy bılikke talap-arazymyzdy qoıýymyz jáne oryndatýymyz kerek!
Bizden suraq – Bir qazaq balasynyń tán azaby, jan qınalysy qalaısha sizderdi beıjaı qaldyrady? Urpaq súıip, nemere baǵatyndaı jasqa jetpep pe edińizder? Elıtaly kotejde turatyn balaǵa suq kóz qadalyp, qoǵamnyń qatygezdigi men ozbyrlyǵynyń nysanyna aınalmaıdy dep kim kepil bere alady?
