Jýyrda ǵana qyzyn qytaı ultynyń azamatyna bergen Súleımen Asqar Baǵytuly Zakon.kz redaksıasyna ashyq hat jiberipti. Ákesiniń aıtýynsha, qyzyn Qytaı azamatyna berýge týystary men jaqyndary áý basta qarsy bolǵan. Alaıda jastardyń mahabbatyna kózderin jetkizgen olardyń kónbeske amaly qalmaǵan. Qytaılyqtarmen qudandaly bolǵan áke hatynyń mazmuny tómendegideı:
Men, Súleımen Asqar Baǵytuly ózimniń aǵaıyn týysqandaryma, dostaryma, jumystastaryma jáne barlyq men tanıtyn aǵaıyndarǵa qyzymnyń qytaı azamatyna turmysqa shyǵýynyń sebebin shynaıy jetkizgim keledi.
Ákesi retinde qyzymnyń qytaı azamatyna turmysqa shyǵýyna baılanysty áleýmettik jelilerde aıtylyp jatqan syndarǵa, atap aıtqanda baıybyna barmaı, jamandap, qarǵap - silep, ne bir jaman sózdermen ata- anasyn, aǵaıyn-týmasyn jáne jastardy kinaláp, qorqytyp-úrkitip jatqandaryńyz óte ókinishti.
«Saýatsyz, namyssyz, jaǵdaıy joq. Qyzdaryn qytaı jigitine satyp jatyr» degen jalǵan aqparat taratýlaryńyz sebepsiz.
Qyzym 2012-2016 jyldar aralyǵynda Máskeý qalasyndaǵy Reseı halyqtar dostyǵy ýnıversıtetin (RÝDN) qyzyl joǵary bilimmen bitirip, eline Qazaqstanǵa keldi. Bilimin jetildirý úshin (magıstratýra) 2016-2018 jyldary Almaty qalasyndaǵy AlmaU (Almaty Menedjment Ýnıversıteti) magıstr ataǵyn alyp shyqty. Sodan Anglıa , Malaızıa elderinde taǵylymdamadan ótken bolatyn. Osy eki jyl ishinde qytaı azamatymen birge tanysyp, birge oqyp, birge taǵylymdamadan ótip jaqsy tanystyqqa aınalyp, arty shynaıy sezimge ulasady.
Ata-anasyna, týǵan úıine kelip óz oıyn, júrek qalaýyn, sezimin jetkizgen bolatyn. Árıne qytaı halqyn biletinimiz bar, bilmeıtinimiz bar. Qazaq halqynyń kózqarasyna baılanysty qarsy boldyq. Qarsylyǵymyz eki jylǵa sozyldy. Biraq sol ýaqyttyń ishinde balalarymyzdyń bir-birine degen shynaıy sezimderine kózimiz anyq jetip óz ruqsatymdy berdim. Bundaı jaǵdaıdy basyna túspeı, júrekpen sezbeı basqa adam balasy durys túsine almaıdy dep oılaımyn.
Meniń áke retinde aldymda tańdaý turdy: eki jastyń qol ustasyp quzdan qulaýyna nemese óz abyroıymdy oılap qalýym. Men eki jastyń baqyty men amandyǵyn tańdadym.
Qazaqtyń ata salt-dástúrimen quda túsip, Almaty qalasynda uzatý toıyn jasadym.
Qazaq qyzynyń qazaq tarıhynda birinshi bolyp meniń qyzym qytaı azamytyna turmysqa shyǵyp jatyr ma edi? Qazaqstanda 2010 -2016 jyldar aralyǵynda 253 Qazaqstan azamatshalary Qytaı azamattarymen turmys qursa, 277 Qytaı azamatshalary Qazaq azamattarymen turmys qurǵan.
Qytaı halqy jaý bolsa 1,5 mln qazaq baýyrlarymyz sol elde qalaı turyp jatyr? Men tańqalatynym, Qytaı halqyń jaý qylyp kórsetip otyrǵan, jalǵan aqparat taratyp júrgen adamdar sonyń ishinde elge tanymal azamattar sizge de, bizge de jaqsylyq tilep júrgen adamdar emes. Búgingi tańda Qazaqstan elinde 130-dan asa ult ókilderiniń aýyzbirshiligimen tynyshtyǵyn buzý dep oılaımyn.
Maýsym aıynyń 15-nen bastap áleýmettik jelilerinde (Facebook, Instagram, whatsapp) tanıtyn jáne tanymaıtyn tulǵalardyń maǵan, januıama,aǵaıyn – týmama aıtylyp jatqan syndarǵa, baıybyna barmaı, jamandap, qarǵap - silep, ne bir jaman sózdermen kinálap, qorqytyp-úrkitýine jol bergen, foto, beınejazbalardy taratqan janashyr degen qonaqtarymyzdyń bul isin eshqandaı túsine almaı otyrmyn. Osyndaı aqparat taratyp jazyp otyrǵan adamdar sizder de ul-qyz ósirip otyrsyzdar, aldaryńyzda ne kútip turǵanyna kim kepil?
Betimizge kúle qarap, qýanyshymyzben qaıǵymyzǵa ortaqtasa júrip bul ne istegenderińiz? Budan bólek bizdiń jaǵdaıymyzdy túsinip tanysa da, tanymasa da túsinistikpen karaǵan baýyrlarymyzǵa bas ıemiz. "Qytaıǵa qyzyńdy berdiń", "nege óltirip tastamaısyz" dep aıtyp, jazyp jatqan adamdarǵa aıtarym sabalarańyzǵa túsip, Alladan qorqyńyz degim keledi. Basymda bolyp jatqan jaǵdaıdy bir Allanyń ózi rettep, bir Alla jar bolsyn.
