Nursultan Nazarbaev Ortalyq Azıa elderiniń basshylarymen birge «Astana» halyqaralyq qarjy ortalyǵyn tanystyrý rásimine qatysty, dep habralaıdy Qamshy.kz aqparat agenttigi Aqordanyń baspasóz qyzmetine silteme jasap.
Memleket basshysy Qyrǵyz Respýblıkasynyń Prezıdenti Sooronbaı Jeenbekovpen, Tájikstan Respýblıkasynyń Prezıdenti Emomalı Rahmonmen, Ózbekstan Respýblıkasynyń Prezıdenti Shavkat Mırzıóevpen birge «Astana» halyqaralyq qarjy ortalyǵynyń ashylýyna arnalǵan sıfrlandyrý kórmesin aralap kórdi.
Qazaqstan Prezıdenti ınovasıalyq qarjy tehnologıalaryn damytýdy kózdeıtin tıimdi ortany qalyptastyrý «Astana» halyqaralyq qarjy ortalyǵy qyzmetiniń birden-bir mańyzdy baǵyty ekenin aıtty.
– «Astana» halyqaralyq qarjy ortalyǵynyń jumysyna qatysýshylar úshin Qazaqstannyń ǵana emes, búkil álemniń kapıtaly qoljetimdi bolady. Qarjy ortalyǵynda postkeńestik keńistikte balamasy joq, buryn-sońdy bolmaǵan jaǵdaılar jasaldy. Keshe ǵana biz saltanatty jaǵdaıda zamanaýı joǵary tehnologıaly ınfraqurylymy bar «Astana» halyqaralyq qarjy ortalyǵy bırjasynyń jumysyn bastadyq. Búginde onyń qyzmetine amerıkalyq NASDAK bırjasy jáne Shanhaı qor bırjasy qatysyp otyr, – dedi Nursultan Nazarbaev.
Tanystyrylym barysynda Qazaqstanda ınovasıalyq qarjy tehnologıalaryn damytý men ilgeriletý úshin qolaıly ekojúıeni qalyptastyrýǵa baǵyttalǵan birqatar jobalar kórsetildi. Sonyń ishinde, e-Justice (AHQO sıfrlyq sot tóreligi júıesi), sıfrlyq krıptobırja, krıptovalútalar úshin depozıtarıı, qarjylyq sýpermarket, kıberqaýipsizdik ortalyǵy, ıslam qarjy tehnologıalary, halyqaralyq startap baǵdarlamalary men basqa da jobalar bar.
«Astana» halyqaralyq qarjy ortalyǵynyń basqarýshysy Qaırat Kelimbetov Ortalyq Azıa elderiniń basshylaryna qarjy ortalyǵy qyzmetiniń negizgi qaǵıdattary jáne óńirdiń qarjy júıeleri úshin jol ashatyn múmkindikter jóninde áńgimelep, Jibek jolynyń boıynda ornalasqan elderdiń kásipkerlerin qarjy ortalyǵynyń qyzmetine belsendi atsalysýǵa shaqyrdy.
Sondaı-aq, tanystyrylym rásiminde «Astana» halyqaralyq qarjy ortalyǵy sotynyń tóraǵasy Lord Garrı Kennet Výlf jáne qarjy ortalyǵynyń basqarýshy dırektory, úzdiksiz kásibı damý búrosynyń kýratory Ernur Rysmaǵambetov sóz sóıledi.
