QR Mádenıet jáne sport mınıstri Arystanbek Muhamedıuly Astana jaıly ándi ózi jazǵan. Atalmysh ánge túsirilgen beınbaıandy mınıstr Facebook-tegi paraqshasynda jarıalady, dep habarlaıdy Qamshy.kz aqparat agenttigi.

"Dostarym, ásem elordamyzdyń mereıtoıyna arnalǵan «Aq ordam - Astana» ánin Capriccio tobynyń oryndaýynda qabyl alyńyzdar. Sózi Shómishbaı Sarıevtiki, mýzykasynyń avtory men. Kóńilderińizden shyǵady degen úmittemin", - dep jazdy mınıstr jelidegi paraqshasyna. 

Aıta keteıik, 6 shilde kúni qazaqstandyqtar Astana kúnin toılady. Merekeni atap ótý úshin birneshe is-sharaǵa memlekettik búdjetten 19 mlrd teńge jumsalatyny habarlanǵan. Ári dál sol kúni Memleket basshysy Nursultan Nazarbaev 78 jasqa toldy.

Al Arystanbek Muhamedıuly Jubanov atyndaǵy respýblıkalyq arnaıy mýzykalyq mektebin támamdaǵan. Óziniń eńbek jolyn 1984 jyly Jambyl atyndaǵy Qazaq memlekettik fılarmonıasynyń memlekettik sımfonıalyq orkestriniń artısi bolyp bastaǵan. "Asyl sezim", "Astana", "Dostarym" jáne taǵy birneshe ánniń avtory.