Joǵarǵy sot tóraǵasy Jaqyp Asanov zańgerler qaýymyna úndeý jarıalady. Bul týraly Qamshy.kz aqparat agenttigi QR Joǵarǵy sotynyń baspasóz qyzmetine silteme jasap habarlady.
Sýdıa – abyroıly laýazym. Kez-kelgen zańgerdiń eń bıik shyńy. Bul jaı ǵana qabilet emes, sonymen qatar aıryqsha bedel, árbir sheshim úshin jaýaptylyqty, ádilettilik pen zańdylyqty joǵary deńgeıde sezine bilý. Oıshyldar sýdıany «sóıleıtin zań» dep jaıdan-jaı aıtpasa kerek.
Bizdiń qoǵamda sýdıalar – bıler soty dástúrin jalǵastyrýshylar. Olar ar-ojdannyń, ádildiktiń, sheshendik ónerdiń, tereń bilim men basqa da qasıetterdiń etalonyna aınaldy. Uly dalanyń myzǵymas abyroıy men senimine ıe boldy. Qazaq handyǵynyń órkendeý dáýiri Áıteke, Qazybek jáne Tóle bılerdiń esimderimen baılanysty bolýy teginnen-tegin emes.
Búginde Memleket basshysynyń tapsyrmasymen respýblıkada sot júıesin jańǵyrtý júrgizilýde. Onyń eń mańyzdy mindetiniń biri - sýdıalardy irikteý júıesin jolǵa qoıý. Sýdıalyq qyzmetke eń laıyqtylar men daıyndyǵy myqty úmitkerler ǵana kelýi tıis. Ol úshin kúrdeli jáne, eń bastysy, ashyq konkýrs qajet. Joǵarǵy Sottyń birinshi basym baǵdarlamasy «MİNSİZ SÝDIA» dep atalýy da sondyqtan.
Biz sýdıalardy irikteý men olardyń kareralyq ósý júıesin jetildirýdiń keshendi sharalaryn pysyqtaýdamyz. Bul jumys Joǵary Sot Keńesimen birge júrgizilýde.
Osy oraıda sot bilimine erekshe nazar aýdarylyp otyr. Bul – sot bıligin jaqsartý men jańa zamanǵy sýdıalardy daıarlaýdyń sheshýshi faktory. Osy mindetti Joǵarǵy Sot janyndaǵy Sot tóreligi akademıasy tolyǵymen oryndap keledi. Akademıa sheteldik ozyq tájirıbe negizinde qurylǵan. Búgingi kúni ol – oqytý baǵdarlamasy sot júıesiniń naqty suranystaryn eskeretin elimizdegi jalǵyz joǵary oqý orny.
Sot tóreligi akademıasynyń túlekteri basqalarǵa qaraǵanda birqatar artyqshylyqtarǵa ıe.
Onyń sebebi mynadaı:
Birinshisi. Bolashaq sýdıalardy Joǵarǵy Sottyń sýdıalary men jetekshi sarapshylar oqytady. Oqý barysynda sýdıalardyń kúndelikti jumysyndaǵy mysaldar keńinen qoldanylady. Sheteldik, sonyń ishinde úzdik quqyq mektepterindegi tájirıbege erekshe nazar aýdarylady.
Ekinshisi – praktıkalyq mashyq: oqytý merziminiń 60%-y sot organdarynda tájirıbeden ótýge arnalǵan.
Úshinshisi – shynshyldyq, adaldyq, beıtaraptylyq sıaqty jeke qasıetterdi damytý. Ózin-ózi jetildire bilý. Tulǵalyq damý boıynsha úzdik baǵdarlamalardy qoldaný. Akademıada buǵan asa mán beriledi.
İrikteý sapasyn arttyrý maqsatynda magıstranttardy qabyldaý tártibi ózgertildi.
Emtıhannyń biri – quqyq salalary boıynsha naqty keısterdi sheshý.
Budan keıin esse jazylady. Úmitker ózi jaıly, óziniń eńbek joly jáne ne úshin Akademıa magıstranty bolǵysy keletini týraly áńgimelep berýi tıis.
Qajetti upaı jınaǵan árbir úmitkerdiń kásibı qasıetterin anyqtaý úshin ózim jáne Joǵary Sottyń basqa da ókilderi olarmen áńgimelesý ótkizemiz.
Akademıany qarjylandyrý erejesine sáıkes úmitkerler memlekettik qyzmetshi bolýy tıis ekendigin birden atap ótkim keledi. Oqý kezinde olardyń eńbek ótili men jalaqysy saqtalady. Sonymen qatar sýdıalyqqa úmitkerlerdiń zańgerlik jumys ótiline qatysty qoıylatyn zań talaptary bar.
Eger jigerli bolsańyz, aldyńyzǵa maqsat qoıyp, soǵan umtylsańyz jáne óz ómirińizdi zań men qoǵamǵa qyzmet etýge arnaımyn deseńiz, onda Sizdi Sot tóreligi akademıasynyń magıstratýrasyna shaqyramyn. Bul oqý ornynda sýdıa bolý úshin qajetti bilim men qabiletke ıe bolasyz.
Qabyldaý barynsha obektıvti túrde ótedi. Men komısıanyń jumysy ashyq, ádil bolatynyna kepildik beremin. Akademıaǵa eń laıyqtylar ǵana túsedi.
Biz Qazaqstannyń sottarynda úzdikterdiń úzdigi jumys jasaǵanyn qalaımyz! Solardyń biri bolyńyz! Elimizdiń damýyna óz úlesińizdi qosyńyz! Sizdi kútemiz!
Joǵarǵy Sottyń
Tóraǵasy J. Asanov
