Burynǵy OQO, qazirgi Túrkistan oblysyndaǵy Abaı aýylynda taǵy bir bala jasóspirim shaǵynda zorlanǵanyn aıtty. Bul týraly 22 jastaǵy jigit «Eýrazıa» birinshi arnasynyń tilshilerine aıtyp bergen eken.

Jigitti osydan alty jyl buryn bir aýylda turatyn jigitter zorlaǵan kórinedi.

«Olar menen «túnde ne bolǵany esińde me?» dep surady. Menimen seksýaldyq qatynasta bolǵanyn jáne sony vıdeoǵa túsirip alǵandaryn aıtty», - dep túsindirdi túrkistandyq.

Eger bireýge aıtatyn bolsa, vıdeony búkil aýylǵa taratyp, ata-anasynyń abyroıyn aırandaı tógemiz dep qoqan-loqy kórsetken eken.

Osy kúnge deıin jigit birneshe ret polısıaǵa aryz túsiripti, alaıda munysy qur áýreshilik qana. Jigittiń aıtýynsha, tyrp etip qozǵalaıyn degen quqyq qorǵaý organdaryn kórmepti. Qoldaryn qur siltegen. Buǵan jigit kinálilerdiń laýazymdy týystary bar dep boljaıdy.

2012 jyly óziniń zorlanǵanyn aıtqan jigit Jánibekov atyndaǵy №73 mektepti bitirgen eken.

Aıta keteıik, budan buryn jeti jastaǵy balanyń ájesi №73 mektepke birinshi synypqa barǵan nemeresiniń zorlanǵanyn aıtyp, bul máselege búkil Qazaqstan alańdaǵan edi. Qazirgi ýaqytta shetelden sarapshylar qosylyp, atalmysh iske qatysty saraptama jumystary júrgizilip jatyr. Birinshi synyp oqýshysyna qatysty memleket basshysy Nursultan Nazarbaev ta pikir bildirgen. Prezıdent bul máselege qatysty kinálilerdiń áli kúnge tabylmaı jatqanyna tańdanysyn bildirgen edi.