Qoǵamda toqal bolsań úlde men búldege oralasyń degen túisinik qalyptasqan. Osyndaı pikirmen otbasyly erkekpen kóńil jarastyryp, keıin opyq jegender barshylyq. Solardyń biri Alına. Alınanyń bastan ótkergen sumdyq jaǵdaıy jas qyzdarǵa sabaq bolady degen úmitpen, onyń comode.kz-ke bergen suhbatyn nazarlaryńyzǵa usynyp otyrmyz.
Esimim Alına. Ótken ómirimdi eske alǵym kelmeıdi. Alaıda jas qyzdar bireýdiń ekinshi áıeli bolmaýy úshin sabaq bolar degen maqsatpen bastan ótkergenimdi aıtyp bereıin.
Anam meni jáne meniń 4 inimdi jalǵyz ózi tárbıeledi. Ákemiz bizdi tastap ketti. Aýylda, qara sý men qara nandy jep óstik. Men mundaı ómirden ábden qajydym. Mektep bitire sala aýyl kvotasymen pedagogıkalyq ınstıtýtqa grantqa tústim.
Stýdent kezimde de joqshylyqtyń zardabyn ábden tarttym. Daıashy, eden jýýshy bolyp jumys istedim. Tipti strıptız bılemek boldym (dene bitimim saı kelmedi). Shákirtaqymnan aıyrylyp qalmaýym úshin sabaǵymdy jaqsy oqydym. Jataqhanada turdym.
Qydyrǵym da keletin. Ádemi kıimge aqsha tabýdyń túrli joldaryn izdedim. Jaqsy jigitpen tanysýdy armandadym. Almatyda ádemi toıym ótip jatqanyn elestetetinmin. Alaıda maǵan tek kóshede doner satyp turǵan erkekter ǵana qyryndaıtyn.
Bolashaq kúıeýimmen saýyq keshinde tanystyq. Ol meni unatyp qalǵan eken. Sol keshte jataqhanaǵa deıin jetkizip saldy. Men adamdarmen tez til tabysyp ketemin. Sondyqtan onymen áńgimemiz jarasyp ketti. 22 jas ereksheligi maǵan kedergi bolmady. Ol maǵan áke de boldy. Onymen tanysqannan keıin ashtyq degendi bilmedim. Onyń bala-shaǵasy bar ekenin eki aptadan keıin, ekinshi áıeli bolýǵa usynys jasaǵanda bildim. Sol kezde salafıt ekenin de aıtty. Muny estigende shoshyp kettim. Dámhanada onyń ózi sekildi saqaldy dosymen otyrǵan edik. Men úıge qaıtqym keletinin aıttym.
Kelesi kúni ol maǵan aqsha berdi. «Ekinshi áıelim bolasyń ba álde joq pa?» dep suraqty tótesinen qoıdy. «Seniń mundaı jerde ómir súrgenińdi qalamaımyn. Páter jaldap bereıin» dedi. Men aqshany aldym, páterge kóshtim. Ekinshi áıeli bolýǵa kelistim.
Nekemiz qıylmady. Ol ózi ımam ekenin aıtty. Men jýynǵannan keıin. Duǵa oqydy da maǵan da telefonnan duǵa oqytty. Osydan keıin ol meni barlyq kúnálárimniń keshirilgenin jáne tazarǵanymdy aıtyp, sendirýge tyrysty. Men oǵan sendim.
Osydan keıin ómirim tozaqqa aınaldy. Ol maǵan erkektermen sóılesýge tyıym saldy. Oqyǵanymdy qalamaıtyn, biraq jumysqa barýǵa mindetti edim. Ol ýaqytta balabaqshaǵa bala kútýshi bolyp jumysqa turǵan edim. Uzyn kóılek kıýge májbúrledi. Ol meniń hıdjap kıgenimdi qalady. Alaıda men áli daıyn emes ekenimdi aıtyp, bas tarttym.
Ol aptasyna bir ret qana úıge keletin. Men onyń quly sekildi boldym. Ol kelgende úı muntazdaı taza turý kerek. Úı aıaq kıimi jyly bolý qajet. Ol kelgende ony ózim aıaǵyna kıgizetinmin. Dastarhan jaıylyp turý kerek. Bir kúni kámpıt salatyn ydysta marmelad turǵanyn kórip, sol úshin urysqany bar. Sebebi marmeladta jelatın bar. Al jelatınde shoshqanyń maıy bar. Shujyqty da jeýge bolmaıtyn. Halal bolǵannyń ózinde onda shoshqa eti bar dep kúdiktenetin. Turyp tamaq jesem aıqaılaıtyn. Turyp tamaq jeý kúná ekenin aıtatyn.
Áıelderge zat sekildi qaraıdy. Áıel kúıeýiniń aıtqanyn buljytpaı oryndaý kerek dep esepteıtin. Maǵan múlde kómektespeıtin. Barlyǵyn ózim jasap, ózim sheshetinmin. Týystyq qatynasymyz bolmasa ózge erkekten kómek suraýǵa ruqsat bermeıtin. Al týys er adamdardan tek inilerim ǵana boldy.
Ol maǵan aqshany sanap beretin. Páter aqysy, komýnaldy shyǵyndar degendeı. Eger birnárse satyp alǵym kelse ol zattyń qanshalyqty qajet ekenin túsindirýim kerek. Eger satyp alǵym keletin zat maǵan kerek emes dep sheshse aqsha bermeıtin. Toqaldardyń barlyǵy qymbat páterde turady, ádemi kólikpen júredi degen pikirdi joqqa shyǵarǵym keledi.
Zańdy áıeliniń kóligi bar ekenin biletinmin. Úsh balasynda da bir-bir kólikten boldy. Kishisi mektepte oqysa da jeke kóligimen júretin. Ózinde úsh kóligi bar edi. Otbasymen úlken úıde turdy. Jylyna eki ret otbasymen demalýǵa baratyn. Barlyq týystaryna kómektesetin. Tek maǵan ǵana kómektespeıtin.
Qas julý, balaǵat sóz aıtý haram ekenin aıtatyn. Biraq óziniń aýzynan aq ıt kirip, kók ıt shyǵatyn. Bolmashy sebepke bola urysatyn. «Jańa jylyńmen» dep quttyqtaǵan dúkenshige «Raqmet» dep aıtqanym úshin urys estigenim esimde.
Ol telegramda Islamdy dáripteıtin birneshe paraqshaǵa jazylǵan. Maǵan da túrli aýdıo, vıdeo jiberip otyratyn.
Jas áıel úshin ózinen 22 jas úlken erkekpen ómir súrý óte qıyn. Ol kóp aýyratyn. Men oǵan ekpe jasap, maı jaǵyp, arnaıy tamaq pisiretinmin. Osyǵan qaramastan men ony túsinbeıtinimdi aıtyp shaǵymdanatyn.
Osynyń bárine ne úshin shydaǵanymdy bilmeımin. Ol maǵan eki ret «talaq» dep aıtqan kezi boldy. Qatty ýaıymdadym. Ketpeýin ótindim. Ekinshi ret «qaıda barsań, onda bar» dep ajyrasyp kettim. Birneshe kúnnen keıin jaqsy jigitti jolyqtyrdym. Ekeýimiz birge turdyq. Kóp uzamaı turmysqa shyǵýǵa usynys jasady.
Salafıtpen turǵanym ómirimdegi úlken qara daq sekildi. Endi onyń jeke menshigi emes ekenimdi túsingende jıi qońyraý shalyp, hat jazyp mazamdy aldy. Meni de, jigitimdi de óltirip ketemin dep qorqytty. Bul áreketterin qoımasa, bolǵan jaǵdaıdy áıeline aıtyp beretinimdi aıtqanda barlyǵy sap tyıyldy. Qurbyma da áıeliniń baılanys telefonyn berip qoıǵanymdy aıttym. Áıelinen ol qatty qorqatyn.
