Jýrnalıs Aıjan Qalıevanyń feısbýk paraqshasynda «Paradoks ıaǵnı tıinge aqsha bar, sýǵa nege aqsha joq» degen jazbasy jarıalanǵan bolatyn.

Qamshy.kz aqparat agenttigi sýsyz otyrǵan aýyldyń turǵyndarynyń janaıqaıyna beıjaı qaraı almaıdy. Aıjannan tolyǵyraq aqparat suraǵanymyzda ol bylaı dep tarqatty: «Bizdiń 71-razezd aýylynda mamyr aıynan bastap aýyzsý joq. Mamyr, maýsym aıynda túngi saǵat birden keıin bolsyn sý keletin. Turǵyndar túnniń jarymynda turyp, úılerine sý toltyryp, kirlerin jýyp, jýynyp jatatyn. Oraza aıyn tolyqtaı sýsyz ótkizdik. Atalǵan problema byltyrdan beri bar. Bizdiń aýyl Alataý aýdanyna qarasty bolǵanymen sýdy jeke menshik kompanıa beredi. Jaryqqa da tarıf joǵary. Árbir turǵyn sýdy quny eki júz elý, úsh júz myńnan óz úılerine tartty.

Ermek degen jeke menshik sýmen qamtıtyn JSHS-niń qojaıyny atalǵan máseleniń otyz jyl boıy qaıtalanyp kele jatqanyn aıtady. Óz basym, kemi on ret habarlastym. Aqyr sońy ne istep alasyńǵa kóshti.

Aýyl turǵyndary kósheniń jolyn, jaryǵyn túgel ujymdyq jıynǵa salyp, aqsha shyǵaryp ózderi jasatty. Sýdy óz qaltalarynan kirgizdi. Tym qurysa sony durys ala almaı otyrmyz. Biz Alataý aýdanyna kirgeli birde bir maman kelip, turǵyndardyń jaǵdaıyn suraǵan emes. Jaryq pen sýdyń aqshasyn jınaıtyn adamdardan basqa eshkim kelmeıdi.

Alataý aýdanynyń ákimdigine turǵyndar jınalyp, Eýrazıa arnasymen birge bardyq. Bizdiń shýlap kele jatqanymyzdy aýdan ákiminiń ózi kórip turyp, jıp kóligine otyryp ketip qaldy.

Sharýashylyq bóliminiń mamany atalǵan isti óz qolyna alatynyn aıtyp, jeke menshikke qarasty Ermek myrza telearna aldynda shildeniń besi sý keledi dep ýáde bergen edi. Shildeniń besinen beri bes kún ótti. Bir tamshy sý kórmedik. Dala qyryq gradýs.

Onsyz da aýylymyzǵa baratyn bir ǵana avtobýs bar. Onyń ózi arasy qyryq mınýttan, tórt-bes avtobýs qana. Qaladaǵy jumysynan úıine birneshe “peresadkamen” sharshap keletin jurt sý tasýǵa májbúr. Kim bizdi Almaty qalasynyń turǵyndary deıdi, óz úıimizde sý iship, dáretke bara almaımyz».

Qamshy.kz aqparat agenttigi óz kezeginde atalmysh másele boıynsha ákimdikke habarlasyp, resmı jaýapty talap etetin bolady. Ázirge, ókinishke qaraı, baılanys ornatylmady.