Nazym mamandyǵy boıynsha býhgalter. Bir balasy bar. Qystyń aıynda qaıta-qaıta aýyra bergen balasy úshin jumystan suranǵany bastyǵyna da, ujymyna da unamaı júrgen. «Asannyń qyzýy kóterildi» dep enesi qońyraý shalǵanda bastyǵynyń kózine tike qarap, taǵy qalaı suranaryn bilmeı dal bolǵan. Jumystan shyǵaryp jibermeı turǵanda aqysy tólenbeıtin demalysqa shyǵaıyn dep júrgende aıaǵynyń aýyrlaǵynan biledi. Sondaǵy qýanǵany-aı! Búıtip sóz etip, ózin yńǵaısyz sezingen jumysy qurysyn! Bolashaqta basqa jerge aýysamyn dep sheshim qabyldady ishteı. Ol qaıdan bilsin, eki balań bola turyp jaıly, jaqsy jumysqa turý ońaı emestigin?
Aýladaǵy kórshimmen bolǵan áńgimeden keıin osyndaı pálsapalyq oıǵa berildim. Bes jasar jáne úsh jasar bala tárbıelep otyrǵan aktrısa qurbym esime tústi. Ol da birde «Portfolıomdy (kásibı fotosessıa kezinde fotolardyń jıyntyq papkasy-avt.) jibersem, unaımyn, kastıngke barsam, talantymmen tánti etemin, al «eki balam baryn» bilse, unamaı qalamyn. Atalmysh rólge jas jaǵynan, ómirlik tájirıbem jaǵynan bolsyn saı kelip tursam da menen jas ári bala-shaǵasy joq aktrısa izdep álek bolady. Sondaǵy qorqynyshtary – túsirilimge tolyqqandy qatysa almaı, bala jylasa qashyp ketedi ekenmin. Eki balany baǵyp, qarnyn ash qaldyrmaı, kıimin kirletpeı ósirgen, kúıeýin usaq-túıekpen mazalaı bermeıtin, azyq-túlikti de ózi tasıtyn, úıdi muntazdaı taza qylyp ustaýǵa tyrysatyn áıel bir jumysty durystap isteı almaıdy dep kim aıtty?!» dep qynjyldy.
Televıdenıada jumys istegen kezim esime tústi. Er-azamattardyń deni úıli-barandy, al qyz-qyrqyn jaǵy kúıeýge shyqpaǵan. Olar kúndiz-túni qazaq televıdenıasy úshin aıanbaı eńbek etedi. Sodan bolar, jigitpen tanysyp, áńgime jarastyratyn ýaqyttary joq. Bastyqtar da túski asty tez iship, túnge deıin qalyp isteıtin qyzmetkerlerdi qatty jaqsy kóredi. Kúıeýge shyǵyp, balaly bolyp, toǵyzdan altyǵa deıin otyryp eńbektense, jumys ónbeıdi dep kim aıtty?! Túnge deıin otyratyn "eńbekqor" shabyty kelmeı júrgen, túste uıyqtap, endi oıanǵan jumysker bolýy da ǵajap emes qoı?!
Biz rezúmeni toltyrǵanda bárin búge-shúgesine deıin toltyryp jazamyz. Týǵan kúni, otbasylyq jaǵdaıy, týǵan jeri degenge qosa qandaı rýǵa jatatynyn jazý ǵana qalǵan sıaqty. Shetelde rezúme jazý barysynda otbasylyq jaǵdaı degendi múldem jazbaıdy. Sebebi bul suraqtyń jaýaby mamannyń qanshalyqty kásibine adal, eńbekqor ekendigin anyqtaýǵa kómektese almaıtyn faktor eken.
