Elimizde kádimgi aqshadan aýrý tarala bastady Kádimgi qyzyldy-jasyldy aqsha da asa qaýipti aýrýlardy tasymaldaıdy, dep habarlaıdy ktk.kz.
Almatylyq dárigerler menıngıt, týberkýlez syndy ólimge ákeletin qaýipti bakterıalar banknottardan tabylyp jatyr dep dabyl qaqty. Qarapaıym tazalyq talaptarynyń saqtalmaýynan kózge kórinbeıtin zattar adam aǵzasyna túsip, arty qaıǵyly jaǵdaıǵa ákelýi bek múmkin eken.
Ádette biz «Aqsha - qoldyń kiri» dep jatamyz. Týra maǵynasynda da solaı eken. Iaǵnı, kózge tap-taza bolyp kóringenimen, banknottardyń qaı-qaısysynda da bakterıa qaptap júr. Aqsha aınalysta neǵurlym uzaq júrse, ondaǵy aýrý týdyrǵysh zattar da soǵurlym kóbeıe túsedi.
Mamandar bir ǵana qaǵaz aqshada 500-den asa mıkroaǵza bolatynyn anyqtaǵan. Ári kýpúradaǵy bakterıalar óte ómirsheń keledi. Kók qaǵazdyń osyndaı joǵary qaýpi týraly almatylyq dárigerler qarasha halyqqa eskertý jasady.
Almash Ahmetova, Almaty qalasy qoǵamdyq densaýlyqty qorǵaý departamentiniń bólim jetekshisi:
-Kóp adamdar oılanbastan aqsha sanaǵan kezde aýyzdaryna saýsaqtaryna salyp, túkirip, jatady. Bul adamdarda juqpaly aýrýlardy juqtyrý qaýpi óte joǵary.
Basıla, streptokok, ishek taıaqshasy... Banknottarda óte jıi kezdesetin bakterıalar osylar. Aqshada ómir súretin mundaı zattar adamdy farıngıt, menıngıt, ókpe qabynýy, týberkýlez syndy keselderge dýshar etýi múmkin ekendigi ǵylymı turǵyda dáleldenipti. Biraq, muny kópshilik eskere bermeıdi. Aqshadan taraıtyn aýrýlardan arnaıy qorǵanatyn biren-saran adam bar. Solardyń biri almatylyq Lúdmıla Shýksheva. Ol bala-shaǵasyna aqshany ustatpas buryn, qyzǵan útikpen ábden basady eken.
Lúdmıla Shýksheva, Almaty qalasynyń turǵyny:
-Aqsha bizge deıin nebir qoldan ótedi. Sondyqtan, burynnan banknottardy útikpen basamyn. Joǵary temperatýra kók qaǵazdaǵy aýrý týdyrǵysh zattardy óltiredi. Buǵan qosa, qazir kóbine karta arqyly tólem jasaýǵa tyrysyp júrmin.
Qolyńyzdaǵy teńge qanshalyqty qaýipti?! Ony Ulttyq saraptama ortalyǵyna baryp, teksertýge bolady. Biz tekserýden ótkizgen kýpúradan qaýipti aýrý qozdyrǵysh tabylmaǵanymen, zerthanadaǵy mamandar ony tap-taza dep te aıtýǵa aýyzdary barmady. Al, aqshadan ólimge jeteleıtin keselderdi juqtyrmaıyn deseńiz, qarapaıym tazalyq talaptaryn saqtaǵanyńyz jón. Ásirese, tamaq isher aldynda qoldy jýý mańyzdy. Banknottardy kishkentaılarǵa, tipti, ustatpańyz. Sondaı-aq, dárigerler shekara asyp, shetel aqshasyn qoldanǵan kezde de asa saq bolý qajet deıdi.
Epıdermalyq stafılokokk
Basıla
Streptokok
İshek taıaqshasy
Qurt ınvazıasy
Enterovırýs
Salmonella
Shıgella
