Kúni keshe Qamshy.kz aqparat agenttigi emshiden zorlyq kórgen áıeldiń hatyn jarıalaǵan edi. Atyraý oblysy Qyzylqoǵa aýdanynyń turǵyny Elmıra esimdi kelinshek hatynda dertine daýa tabamyn dep basynyń bálege qalǵanyn, kórgen qorlyǵyn búkpesiz baıandap bergen. Áıeldiń hatyn «emshige barsam, jazylyp ketemin» degen oıdaǵy azamattardyń nazaryna usynǵan edik. Túrli emshilerge aldanyp qalǵan áıelderdiń sanynda shek joq kórinedi. Biri zorlyq kórse, endi biri mıllıondaǵan qarajatynan aıyrylyp otyr. Shymkentte bala kótere almaı júrgen bir top kelinshek keshe «alaıaq emshige aldandyq» dep shý shyǵardy. Bul týraly KTK arnasy habarlady.

Saıram aýylynda turatyn emshige áıelder kelip, 250 myńnan bastap mıllıon teńgeniń arasynda aqsha bergen. Al, táýip óz kezeginde olarǵa bala kóteresiń dep kepildik beripti. Biraq, bala týmaq túgili kelinshekter jarymjan bolyp jatyr eken. Al, emshi bolsa kerisinshe ózin alaıaq áıelderdiń qurbanymyn dep otyr.

Arysy Aqtaý men Atyraýdan, biri Semeı óńirinen kelgen bul kelinshekter júzin kórsetkileri kelmeıdi. Barlyǵy da bir perzentke zar bolyp, kórinbegen dárigeri men emshisi qalmaǵandar. Shymkenttik Unsynaı Maskeevanyń bedeý áıeldi demde emdeıdi eken degendi estip, alyp-ushyp kelgen olardy emshi esh kidirmesten qabyldapty. Barlyǵyna bir dıagnoz qoıyp, bir ǵana emdik shara júrgizipti. Birneshe kúnnen keıin kóterdiń dep qomaqty syılyq ákelýdi buıyrady.

"30-shy mamyrda kúni kóterdiń dep shyqty. Test qyzaryp shyqty. ÝZI-ǵa barsaq eshqandaı bala joq. Men 700 myń teńge tóledim 35 kúnge. 700 myńǵa kiretini tampon men bir maıy bar ýqalaıtyn. Biraq meniń jatyrym kishireıip qaldy. Osyny aıtyp barǵanymda men qorqytty kádimgideı", - deıdi jábirlenýshi.

Ózderi Unsynaı apa dep ataǵan emshi shytyrlatyp aqsha alǵanymen qoımaı, tez kóterý úshin jatqan jerin tazalaýdy buıyrady deıdi kelinshekter. Iaǵnı, medısınalyq ortalyqtyń edenin jýyp, shańyn súrtseń bala kóterýge múmkindik kóbeıetin kórinedi. Aldandyq degenderdiń aryzyn tyńdaǵan quqyqqorǵaýshy Aıgúl Orynbek, qazirdiń ózinde opyq jegender sany 40-tan asqanyn aıtady.

"Qazaqstannyń ár túkpirinen óte kóp. Atyraý jaqtan óziniń matkasynan aırylyp jatqan qyzdar bar, Almaty jaqtan 2 trýbkasynan aırylyp jatqan qyzdar bar. Iaǵnı bul kisi ÝZI-ǵa túspeısiń dep qyzdardyń senimine kirip, psıhologıalyq turǵydan qysym kórsetip densaýlyǵyna zaqym keltirip otyr ǵoı. Iaǵnı, qazir reanımasıada jatqan qyzdar bar", - deıdi quqyq qorǵaýshyAıgúl Orynbek.

Emshiniń eminen soń eńiregendermen birge medısınalyq ortalyqqa barǵanbyz. Tek, aldymyzdan shyqqan kómekshileri áýeli emshi áıeldi joq dep, kelgenderdi betten alsa, artynsha tilshilerdi ǵana ishke kirgizdi. 55 jastaǵy áıel ár pasıentten kúndigine 4 myńnan artyq alǵan emespin dep aqtalady. Jurtqa jaqsylyq jasaımyn dep ózim qoqan-loqqy estip jatyrmyn deıdi.

"Aqshamdy qaıtar dep kún saıyn telefon arqyly qorqytyp jatyr. 2 mıllıon, 3 mıllıon bergenbiz dep ótirik soǵyp jatyr. Óltirip ketemiz dep jatqandary da bar", - deıdi emshi Unsynaı Maskeeva.

Jábir kórdim degen emshi qazir 4 adamǵa qatysty tergeý organdaryna aryz túsiripti. Óz kezeginde Unsynaı Maskeevaǵa aldandyq degen áıelder de jappaı polısıaǵa shaǵym jazyp jatyr. Emshiden kóńili qalǵan kelinshekter bul iske elordalyq sheneýnikter nazar aýdarsa deıdi. Sebebi, quryǵy da uzyn qaltasy da qalyń emshi kúngeıde jazasyz qalýy múmkin dep qorqady.