Qamshy.kz aqparat agenttiginiń poshtasyna «Qazaq halqynyń ar-namysyn taptap, ulttyq sezimizdi qorlap otyrǵandar jazaǵa tartylsyn!» degen taqyryppen Oral qalasynyń turǵyny Talǵat Qataýovtan ashyq hat kelip tústi. Ultty kemsitý, namysqa tıý, kıkiljiń týdyrý máselesi zańmen qýdalanatynyn eskere otyryp hatty oqyrman nazaryna usynyp otyrmyz. Ekinshi taraptyń da túsiniktemesin jarıalaýǵa daıyn ekendigimizdi eskertkimiz keledi.                                                  

                                                             QR Bas prokýrory Q.Qojamjarovqa
                                                             QR İshki ister mınıstri Q.Qasymovqa

ASHYQ TALAP HAT!

      Qazaqstannyń halyqaralyq dárejedegi sport sheberi, mánerlep syrǵanaýdan Sochı olımpıadasynyń qola júldegeri DENIS TENNİŃ qylmyskerler qolynan bolǵan qaıǵyly qazasy barsha qazaqstandyqtardyń qabyrǵasyn qaıystyrdy. Jantúrshigelik oqıǵany jasaǵan qanisher qylmyskerler zań aldynda qatań jazasyn alýy tıis. Biz marqum Denıs Tenniń ata-anasyna, týma-týysqandary men áriptes-dostaryna kóńil bildiremiz.

Qylmystyń aty – qylmys. Qylmysty ultqa, jikke, tilge, dinge eshqashan bólýge bolmaıdy. Desek te, Denıs Ten qaıtys bolǵannan keıin áleýmettik jelide (feısbýkta) Aq ERKE esimdi feısbýk qoldanýshy óziniń akkaýntynda ultarazdyqty órshitý maqsatynda «DENIS TENDİ URY, JABAIY, TOPAS QAZAQTAR ÓLTİRDİ. QAZAQTAR ADAM BOLMAIDY. QAIYRSHY QAZAQTAR» dep ashyq jazyp, dúıim jurttyń aldynda memleketti quraýshy – qazaq halqynyń ar-namysyna úlken nuqsan keltirip, ulttyq sezimizdi qorlaýda. Aq Erkeniń osy ultaralyq arazdyq týǵyzatyn sózin AIKERIM JÝMANOVA esimdi feısbýk qoldanýshy «durys jazǵan» dep ony qoldap otyrsa, RAMILÁM ADILJAN esimdi «Jaǵa ustatty» tobynda osy jazbany keńinen taratyp otyr. «Jaǵa ustatty» tobynda tórt júz myńǵa jýyq (400 000) jazylýshylar tirkelgen. Joǵaryda aty-jónderi atalǵandar ultarazdyqty qozdyrǵan, qazaqtardy kemsitken jazbalardy óshirińder degen jazýlarǵa eshqandaı kóńil bólmeýde, kerisinshe, qazaq halqynyń ar-namysyna nuqsan keletin neshe túrli sózder jazyp, odan ári órshitip otyr. Sol sebepti, bul adamdardyń áreketterin qazaqtardy kemsitý, qazaq ultyna mensinbeýshilikpen qaraý jáne qazaqtardy ózge ulttan tómen sanaý jáne ulttyq sezimizge tıisý arqyly elimizde ultarazdyqty qasaqana nasıhattaý dep qoǵam tarapynan baǵalaımyz. Qazaq halqyn kemsitip, ulttyq qadir-qasıetimizdi qorlaǵan áleýmettik jelide keń taralǵan bul jazbalary boıynda qazaq qany bar, «men qazaqpyn» degen álemdegi 18 mıllıonǵa jýyq barsha qazaqtardyń ar-namysyna tıip, ulttyq sezimin qorlaýda.

TALAP ETEMİZ!

Qazaqstan Respýblıkasynyń Konstıtýsıasy men elimizdiń qoldanystaǵy zańnamasynda áleýmettik, ulttyq, násildik nemese dinı arazdyqty qozdyrý qylmystyq jazalanatyn is-áreket bolyp tabylady.

1. QR aýmaǵyndaǵy zańdy qadaǵalaý jáne qoǵamdyq tártip pen qaýipsizdikti saqtaý organynyń eń joǵary basshylarynan, sizderden, qazaq halqyn kemsitip, ulttyq qadir-qasıetimizdi túsirý arqyly ultarazdyqty órshitip otyrǵan adamdardy tez arada izdestirip taýyp, olardy zań aldynda jaýapkershilikke tartýlaryńyzdy jáne qazaq halqy aldynda áleýmettik jeliler arqyly keshirim suraýlaryn talap etemiz!
   2. Ultarazdyqty órshitken jazbany jarıalaǵan jáne únemi ádepsiz, uıatsyz sózderdi nasıhattap júrgen "Jaǵa ustatty" tobyn japtyrýdy suraımyz!

Talǵat Qataýov

Oral qalasynyń turǵyny

Ashyq hatqa qol qoıý jalǵasyn tabady