Konstantın Gorojankın qyzmet etetin «Qazkontent» AQ Basqarma tóraǵasy Evgenıı Kochetov qyzmetkeriniń áreketine qatysty málimdeme jasady dep habarlaıdy Qamshy.kz aqparat agenttigi.  Ol Gorojankınniń jaqsy qyzmet atqarǵanyn, alaıda qyzý talqyǵa túsken pikiri úshin táýelsiz dırektorlar keńesinen shyǵarylǵanyn aıtty. 

"1. Aqparat jáne komýnıkasıalar mınıstrligi tarapynan Gorojankınniń pikiri boıynsha İİM-ne resmı xat joldandy. Atalǵan fakt boıynsha Qazaqstan Respýblıkasynyń Qylmystyq kodeksiniń 174-babymen (áleýmettik, ulttyq, rýlyq, násildik, tektik-toptyq nemese dinı alaýyzdyqty qozdyrý) Almaty qalasynyń İİD 8 tamyz kúni SDTBT tirkelip, sotqa deıingi tergeý amaldary júrgizilýde.
2. Gorojankın Dırektorlar Keńesine táýelsiz múshelikke Qazaqstandaǵy İT qaýymdastyq pen ınternet-ındýstrıanyń bedeldi ókili retinde saılanǵan bolatyn. 
3. Qazcontent AQ Dırektorlar Keńesiniń múshesi qyzmetin aqysyz atqarady. Naqtyraq aıtar bolsaq, shtatta bolmady jáne jalaqy almady.
4. Osy ýaqyt aralyǵynda onyń jumysyna eskertýler bolǵan joq. Alaıda onyń sońǵy pikiri Qazcontent AQ jumysymen úılespeıdi, osyǵan baılanysty ol Dırektorlar Keńesiniń quramynan shyǵaryldy jáne budan bylaı Qazcontent AQ Táýelsiz dırektor emes.", dep jazdy Evgenıı Kochetov óziniń feısbýk paraqshasyna. 

Eske salsaq, «Qazkontent» AQ dırektorlar keńesiniń táýelsiz dırektory Konstantın Gorojankınniń Facebook áleýmettik jelisinde qazaq ulty týraly jazǵan pikiri qyzý talqylanǵan bolatyn. Ol 6 tamyzda Túrkistan oblysy, Abaı aýylynda zorlanǵan 7 jastaǵy balanyń isine qatysty jazylǵan jazbanyń astynda pikir qaldyrǵan.

«Másele gende. 19 ǵasyrda Qazaqstanda saıahattaǵan saıahatshylardyń jazbasynda jergilikti turǵyndar malmen jynystyq qatynasqa túsetini jáne gomoseksýalızm týraly jıi aıtyldy» dep jazǵan.