Búgin «Tulpar minip, Tý alǵan» Ulttyq baıqaýyn qorytyndyladyq. "Mamyrdyń ortasynda jarıalanyp, el ishinde erekshe qoldaýǵa ıe bolǵan jobaǵa Almatynyń 1300-den astam oqýshysy qatysty. Ákimdik bekitip bergen ereje men medıajospar boıynsha, qyrkúıektiń 10-19-y aralyǵynda ótken aýdandyq kezeńde ár aýdannan 3 jeńimpaz anyqtalyp, 8 aýdannan jalpy 24 bala qalalyq qorytyndy kezeńge joldama aldy.
«Kil myqtyda kim myqty?» degendeı, «myńnan – tulpar» shyqqandardan «júzden – júırikti» anyqtaý Ómirzaq Aıtbaev, Ýálıhan Qalıjan, Qalı Sársenbaı, Tynysbek Qońyratbaev, Temirhan Tebegenov, Serikqazy Qorabaı syndy akademıkter men ǵylym doktorlary jáne profesorlar men qabyrǵaly qalamgerlerden quralǵan qazylar alqasy úshin ońaıǵa soqpady. Sondyqtan da saıys úsh týrǵa ulasyp, qazylar jeńimpazdardy anyqtaý úshin aqyldasý bólmesine birneshe ret barýǵa týra keldi. Ádildiktiń aldyndaǵy zor jaýapkershilikti moıyndaryna alyp, ortaq sheshim qabyldaǵan qazylar alqasyna uıymdastyrýshylar tarapynan alǵys aıtamyz.
Aıtpaqshy, úsh kúnnen beri biraz kisiler telefonymyzǵa tynym bermedi. Olardyń kópshiligi «Balama jeńis alyp ber, júldeniń kólemdi bóligi seniki bolady» dep habarlasqan ata-analar (olardyń ishinde áleýmettik jelide qazir belsendi bolyp jatqandary da bar). Al biz «Kim myqty? Ony anyqtaıtyn qazylar!» degen ýáj aıtyp, sol sózimizde turdyq.
BÚGİNGİ JEŃİMPAZDAR:
I oryn: Arýjan Absattar,
II oryn: Abylaı Berdashev,
III oryn: Bekzat Shardarbek.
YNTALANDYRÝ SYILYǴY:
- Shyńǵysqan Armıa,
- Mánshúk Arystanbek,
- Sanat Ǵızatuly.
